دعاء فاروق تعلق على سفاح الجيزة: لو هتقتل ما تصليش.. والجمهور يرد

وجهت الإعلامية دعاء فاروق رسالة لكل شخص يستغل الدين كستار له، كما علقت على مسلسل سفاح الجيزة الذى يتم عرضه الآن على منصة شاهد.

نشرت دعاء فاروق عير صفحتها الشخصية بموقع "إنستجرام"، فيديو لها وهى تتحدث عن مسلسل سفاح الجيزة، قائلة: "أنا بصراحة مابقتش بثق فى حد، ولسه إبراهيم فايق منزل بوست على السفاح وإنه كان جاره، وأنا الحقيقة مش بحب أتفرج على حاجة فيها قتل والحاجات دى لأني بخاف، وإبراهيم فايق جه ورعبنى أكتر".

واستكملت حديثها موجهة رسالة حادة للأشخاص الذين يدعون التدين مثل شخصية السفاح، معلقة: "بيقولوا إنه كان أكتر حد متدين وبيصلي، بتتدينوا ليه يا جماعة ماتتدينوش أرجوكم ما تتدينوش، يعنى خانق نفسك وخانقنا وعامل فيها من برا متدين، يعني بتتدين ليه وأنت هتختمها بقتل الستات أو بتعمل مصايب، دا تدين ظاهرى مش حقيقى لأنه ستار علشان يخدع بيه الناس، أرجوك حط ستارة تانية يعنى مالوا الكاس والسجارة، يعنى هتختمها بقتل ماتصليش".

تعليقات الجمهور على دعاء فاروق

علق العديد من متابعي الإعلامية دعاء فاروق، على الفيديو الخاص بها عن سفاح الجيزة، والتى جاءت كالآتي: 

• هى دى قصة ولا حقيقة لأن اذا قصة المؤلف قاصد يشوه المتدينين اتقوا الله يعني اللي بالكاس والسيجارة هو اللى كويس.

• بيظلموا الإسلام والدين معاهم.. حسبي الله ونعم الوكيل.

• الدرس أن محدش يتخدع في المتدين.

• أستغفر الله.. ازاي التدين؟ دول بيتعمدوا الإساءة للدين.

• التدين مالوش دعوة.. هما فعلا بيتستروا بجرايمهم بالتدين.

• مهو أكيد مش متدين لأن قلبه ميت بس بيتظاهر بالتدين على فكرة المتدين بجد الناس مابتعرفش أنه متدين.

• المسلسل مستوحى من قصة حقيقية الشخص الحقيقى كان إنسان متدين قدام كل الناس وزوجته قالت إن الناس كانت بتقوله يا شيخ وكان حريصًا على الصلاة فى المسجد.
   
• الصلاه ملهاش علاقة بالتدين.. الصلاة لازم نصليها فى أوقتها هو بقى بيعمل ايه بعدها دى حسابها فى الدينا اخده والله اعلم حسابه في الآخرة ايه، لأنه اكيد استغفر ربنا وهو محبوس وندم على اللى عمله ربنا يحفظنا.. بس الناس دى بيبقوا مش كويسين نفسيا.  

علاقة سفاح الجيزة الحقيقى بإبراهيم فايق

وسبق أن نشر الإعلامي إبراهيم فايق عبر صفحته الشخصية بموقع "X"، كاشفا عن علاقته السابقة بسفاح الجيزة الحقيقي، قائلا إن السفاح كان يعمل فى سوبر ماركت أمام منزله فى الهرم تحت اسم القذافى، وأنه كان يتميز بالود والأدب ولا يترك فرضًا، كما عبر عن صدمته عندما علم بحقيقته.