خالد محمود: التمثيل جذبني من حلم الطيران

تحدث الفنان خالد محمود عن بدايته الفنية، وكشف عن رأيه فى مصطلح السينما النظيفة.

بداية خالد محمود الفنية

حل الفنان خالد محمود ضيف فى برنامج المنسى المذاع على قناة "هى"، مع الإعلامية إنجى هشام، وكشف عن تفاصيل بدايته الفنية وتخليه عن الطيران من أجل الفن، قائلا: "كنت عايز أقدم فى الطيران وفى معهد الفنون المسرحية، لكن التنسيق دخلنى دار العلوم، روحت أقدم فى المعهد لقيت التقديم خلص، فقررت أنى أقضى سنة فى دار العلوم وبعدين أرجع أقدم تانى، وفعلا قدمت وعديت من الإختبارات لحد ما لقيت اسمى من ضمن الـ14 طالبا اللى نجحوا فسيبت دار العلوم".

وتابع حديثه عن بداية دخوله مجال التمثيل، قائلا: "بعد ما تخرجت في المعهد بدأت العروض تجيلى، مع إنى كنت بدأت أمثل من وأنا فى السنة الثانية فى المعهد، وكان أول شغل ليا كان مع الفنان محمود ياسين فى مذكرات زوج، بعدها طلبنى الفنان فريد شوقى لفيلم شاويش نص الليل، ومن بعدها بقى بدأت العروض".

كما تحدث عن حلمه بالطيران، قائلا: "فضل حلم الطيران شاغلنى، فروحت قدمت أول ما نزل التقديم ونجحت، فروحت ودرست طيران بس كنت عملت رصيد فى التمثيل، وكان بييجي ليا عروض عمل 6 و7 مسلسلات وكان بيطلب التفرغ، فانسحبت وروحت للتمثيل".

وجهة نظر خالد محمود فى الفن

كشف خالد محمود عن وجهة نظره فى الفن، قائلا: "انا بشوف الفنان قدوة مهمة، وأكبر دليل أن الممثل الكويس الناس بتكون مبسوطة بيه ومتابعاه، وبتكون ردود فعل الناس أن دوره إيجابى ومفيد للمجتمع، لكن الممثل اللى بيضر هتلاقي الناس مش بتخاف عليه لأنه قدوة سيئة، والفن لو ملوش رسالة مكنش فيلم زى فيلم كلمة شرف لفريد شوقى، يساعد على تغيير قانون فى الحياة الاجتماعية، أو زى فيلم جعلونى مجرما". 

وعن مصطلح السينما النظيفة، تابع حديثه: "أنا ضد أى حد يقول أن الفن مش رسالة وإلا ليه اتسمى قوة ناعمة، انا بشوف أن السينما لازم تكون نظيفة، لأننا بنشتغل علشان نمتع الناس وتتبسط من خلال السينما أو التليفزيون، فأنا مش ضد السينما النظيفة".

كما وضح وجهة نظره عن مشهد القبلة فى فيلم شاويش نص الليل، قائلا:  "دا مكنش بإيدى ومش أنا صاحب القرار، الفيلم كان بطولة واحد عنده 18 سنة، ولما شوفت الفيلم أنا مرضتش عن نفسى فى المشهد دا، مع أن الفيلم وصل رسالة كبيرة".

رفض خالد محمود للقبلات فى أعماله 

تابع خالد محمود حديثه عن السينما النظيفة، قائلا: "لما قعدت مع نفسى، قررت أنه استحالة أعمل عمل فيه قبلات، واتعرض عليا فيلم كان فيه قبلات فسألت المخرج عن المبرر واتكلمنا واتحذف المشهد، ومن وقتها وكل حاجة بالنسبة ليا تمام".