ماجد الكدواني: بشكر ربنا على مراتي وحادث سبب دخولي الفن

حل الفنان ماجد الكدواني ضيف فى برنامج صاحبة السعادة، مع الفنانة والإعلامية إسعاد يونس، المذاع على قناة Dmc. حيث تحدث عن بعض كواليس أعماله، و حياته الشخصية، كما بكى عندما تفاجأ بحضور ابنته للبرنامج وغنائها له، كما حضر صديقة المنتج أحمد الجناينى.

أبرز تصريحات ماجد الكدواني

-لما كنت فى الكويت حصلتلي حادثة أثرت عليا فى دخولى الفن.

-واحد زميلى طلب إني أغششه فى الإمتحان رفضت وبعدها أخوه خبطنى بالعربية.

-مكنتش فاهم ليه ربنا يعمل معايا كده لحد ما كبرت وكان تقديم المعهد متوقف على الجيش.

-بسبب رجلى خدت إعفاء من الجيش ودخلت المعهد وقتها فهمت حكمة ربنا.

- مش بغصب على حد يجى فرح ابنى، بس اتفاجأت بحضور كبير.

-لمست المحبة من الكل اللي جم الفرح، وكريم عبد العزيز قالى دا فرح ابني.

-أحمد الجنايني تعب فى تحضيرات الفرح أكتر مني، لأنى كنت بصور أبو نسب.

-ولادى ساندرا ويوسف هما نقطة ضعفي، هما ثمرة الحمد لله وثمرة الحياة غالية.

-ابني يوسف صاحبي من صغره، وهو شخص مسئول وبيهمنى رأيه.

-لما راح يتجوز كنت حاسس إني رايح عملية وخايف، ولما سافر أمريكا يدرس كانت صعبة عليا.

-مش قادر اتخيل أن فى واحد ممكن يجى وياخد ساندرا.. إحساس صعب.

-بقيت بحب أعيش اليوم بيومه وبكرا بتاع ربنا.

-سندرا درست فى أمريكا ورجعت مصر علشان تدرس الموسيقى.

-غنت لما لقت دعاء السباعى فى وشها والأستوديو مفتوح، سجلت أغنية لمستك وبعدين غنت بنت أبوها.

-نصيحتى لبنتى هى الثقة فى النفس، وتعمل اللى عليها وتسيب الباقي لربنا.

-حاولت أربيهم بطريقة صحيحة وملتزمة، لكن بلطف دون شدة.

-بشكر ربنا على وجود إسعاد يونس فى حياتى لأنها سبب فى ترتيبات كتير شجعتنى.

-ربنا كان بيحب والدى وهو كمان كان بيحبه، وبسبب قفلته عليا أنا وخواتى سابلى حيطة اتسند عليها.

-بيومي فؤاد عشرة عمر من أيام الجامعة.

-اتقابلنا فى مسرحيات الكلية، وقضيت معاه أفضل 5 سنين من عمرى.

-بحب الفسيخ جدًا وهو الحاجة الوحيدة اللى مش بعرف أشبع منها.

-بدأت تمثيل قبل التخرج بسنة فى 1993، وشاركت فى مسلسل سر الأرض بعد تخرجي.

-كنا بنتخانق مين يقول المعلومة الزراعية وكنا بنهرب منها.

-مثلت فى مسلسل أرابيسك بعد تخرجي من المعهد.

-شافنى الدكتور أسامة أنور عكاشة فى التصوير وقال للمخرج جمال عبد الحميد "خلى بالك منه".

-ارتحت لأحمد الجناينى، لأنى لازم أحس بالأمان علشان أمثل.

-أحمد هو الشخص اللى وفرلى كل حاجه الأمان فى العمل، والإحترام فى التعامل.

-قابلت زوجتي فى سنة 3 كلية، واعترفتلها لكن هى ماكنتش بتفكر فى الارتباط وقتها.

-كنت بصبح عليها 10 مرات واروحلها قسم التصوير، لحد ما قربنا من بعض.

-هى إنسانة عاقلة وحكيمة ومنظمة ومفيدة جدًا، ومن غيرها كان ممكن أروح مكان تانى.

-بعتذر ليها على كل مرة ضايقتها فيها، وبشكر ربنا أنه خلاها فى حياتى واتحملتنى.