ريم طارق طليقة حسن شاكوش تهاجم بلوجر شهيرة.. متعمليش تريند على قفايا

ردت ريم طارق طليقة مطرب المهرجانات حسن شاكوش، على البلوجر الشهيرة فرح شعبان زوجة البلوجر علي غزلان، بعدما تحدثت فرح عنها في برنامجها الذي يحل مشاكل الطلاق بين الأزواج، وأكدت أنها تستغل ما حدث لتصبح تريند وتلفت إليها الأنظار.

رسالة ريم طارق لـ فرح شعبان 

وجاء رد ريم طارق على البلوجر فرح شعبان من خلال بث مباشر عبر صفحتها على موقع التواصل الاجتماعي "انستجرام" وقالت: "في ناس كتير بعتتلي الفيديوهات بتاعة البلوجر فرح شعبان من برنامجها، وهى بتتكلم عني أنا وطليقي حسن شاكوش، وكانت بتتدخل جدًا في حياتنا الشخصية أكتر مننا مش عارفة ليه بصراحة، بس إحنا حصل ما بينا قعدة صلح من 3 أيام وخلاص الراجل اداني كل حاجتي اللي عنده بما يرضي الله والموضوع انتهى".

طليقة حسن شاكوش تهاجم البلوجر فرح شعبان

وأكملت ريم طارق حديثها هجومًا على البلوجر فرح شعبان قائلة: "أنا عايزة افهم انتي عايزة ايه دلوقتي، عايزة تعملي مشكلة وخلاص، حابه خراب البيوت، ده انتي بتعملي حلقات بتتكلمي فيها عن الطلاق، مش المفروض تحترمي حاجة زي دي، ده بدل ما تطلعي وتقولي أن الطلاق الصح والمفروض أنه يتم في هدوء بين الطرفين بدون تدخل الإعلام، انتي طالعة تعملي تريند على قفايا يعني، عايزة اعرف انتي عملالي فولو لحد دلوقتي ليه وكنتي بتكلميني في أول المشكلة وعايزة تعرفي كل التفاصيل ليه".

وتابعت ريم طارق وقالت: "انتي دخلتي بيتي وقت الخطوبة، بجد عيب اتقي ربنا انتي ست متجوزة وعندك طفل، وربنا اداكي نعمة حاولي تحافظي عليها لأن مش كل البنات دلوقتي طايلينها، ويمكن كنت أتمنى أبقى زيك، فبلاش تفرحي وتشمتي في طلاق الناس متطلعيش نفسك ملكة بجناحات في مشكلة اتنين بيسيبوا بعض وبيتطلقوا".

كما ذكرت ريم طارق مشاكلها مع طليقها الفنان حسن شاكوش، وقالت: "أنا كنت بحارب عشان أخد حاجتي وحقي وبعد ما خدتها اتضايقت وتعبت، احترمي إن أنتي بتعملي برنامج عن الطلاق، على الأقل كنتي استضفتينا وتحاولي تصالحينا على بعض، عيب أنتي شوهتي صورتي وكنتي هتخليني أعمل حاجة أندم عليها بعد ما اتفقت أنا وهو على الصلح، هتستفادي إيه، ودخلتي على اللايف ليه دلوقتي".

واختتمت ريم طارق رسالتها الموجهة للبلوجر فرح شعبان قائلة: "فهميني انتي مين سمحلك تعملي كده، اتقي ربنا وبلاش تجيبي سيرة ريم تاني، لو عايزة تعملي برنامج محترم يبقى مش على حساب أعراض الناس، ومش على قذف المحصنات، الطريقة اللي بتعمليها دي عيب وحرام، حتى لو أنا غلطانة أنا ست زيي زيك المفروض إنك كنتي بتساعديني وقت الخطوبة والفرح، دلوقتي بعد الطلاق مساعدتنيش أتصالح ليه، جاية تتدخلي دلوقتي بعد ما حصل صلح، أنا عارفة إن أنتي وهو صحاب أنا مالي وعمري ما قولتلك إنتي بتكلميه ليه".