حورية فرغلى: «اتدفنت الساعة 3 الفجر وبحب المقابر ومبخافش من الموت»

حلت حورية فرغلي ضيفة فى أولى حلقات برنامج "in deep"، مع الإعلامي تامر شلتوت، حيث كشفت الكثير من أسرار حياتها الشخصية وطفولتها، كما كشفت عن كواليس مسلسل ساحرة الجنوب.

أبرز تصريحات حورية فرغلي

لو اتجوزت مش هستحمل حد ينام جنبي على السرير

-هتبقى مشكلة لأنى بحب أمشى فى شقتى براحتى بشورت وأجرى مع الكلاب

-مش شرط كل يوم ميكاب وشعر أنا باكل ضوافرى أصلا

أنا حبيت مرة واحدة فى 2002.. وخطيبى اللى مات كان 175 كيلو

كان عنده مشكلة فى رجله الشمال وكنا قد بعض.. ورغم دا كنت بشوفه أحلى راجل فى الدنيا.

مكونتش ببص لكلام الناس بصيت بس لقلبه واللى جواه.

كفايه أنى سامعة صوته ووجود ريحة برفانه فى المكان

قعدنا سنتين متخانقناش مرة.. كنت لما بفوز فى الفروسية بروح بلاقيه جايب تورتة

دورت على حبه مش لاقياه.. وبقول ليه أشوف الحب دا كله مادام هيتاخد منى

من ساعة ما مات وأنا مش لاقيه حد غيره

بعده مرتبطش ولا حد اتقدملى.. بتحب لكن باتصدم من السن

فى شاب بعتلى رسالة طويلة.. لما سألته عن سنه قالى 22 سنة قولتله قولى يا طنط

من أسباب نجاح ساحرة الجنوب أنى بحب المقابر ومش بخاف منها

رفضت يجيبوا واحدة تانية تعمل مشهد الدفن.. وأنا اللى عملته

اتدفنت فى مقابر العياط الساعة 3 الفجر والدنيا كانت حر ورطوبة فظيعة

لما حفروا الحفرة كانت تلج واطلع منها ألاقى حر.. مخوفتش علشان عارفة أنه تمثيل

مش بخاف من الموت ونفسى يجى لأن الدنيا بقى دمها تقيل

الناس مبقتش بتخاف والأخلاق اتغيرت والعنف زاد ومفيش أصول

غلطتى أنى مش محجبة لكن بصلى وبصوم وحجيت 7 مرات

معرفتش اطلع عمرة لأن لازم يكون معايا محرم.. وبواظب على قراءة سورة الملك.

بدعى ربنا يثبتنى عند السؤال

مش بخرج علشان محدش بيكلمنى ولا بيعزمنى.. ومعنديش أصحاب.

كنت مربية 13 كلبا لكن دلوقتى بقى عندى 8 أحصنة وكلب واحد.

طفولتى صعبة أهلى انفصلوا وأنا عندى 48 ساعة.. دى أكتر حاجة عايزة أنساها.

اتحرمت من طفولتى ومراهقتى.. الدادة بتاعتى كانت أحن واحدة عليا

زوج ماما كان حنين عليا.. وزوجة بابا راسها طارت قدام عيالها فى غارة من غارات العراق

بسبب أزمة طفولتى قعدت 8 سنين مش بتكلم.. الدكتور قال لماما أنى محتاجة حنان أكتر