هشام ماجد: بتشائم من الرجل العناب ومحمد سعد سفرنا إسكندرية بسبب بوشكاش
كشف الفنان هشام ماجد عن شخصية الرجل العناب في الفيلم الذي تعاقد عليه أحمد فهمي، المأخوذ من مسلسل الرجل العناب الذي جمع الثلاثي في 2013.
وتحدث هشام ماجد أثناء لقائه في بودكاست بتاع أفلام مع الإعلامي أحمد كامل عن فيلم رجل العناب قائلًا: " أنا وشيكو مش مشاركين في فيلم رجل العناب، هو أحمد فهمي سألنا بس كل واحد كان مشغول في حاجة فاعتذرنا، قالنا هعمله أنا ووافقنا طبعًا، بس عمومًا أنا بقيت بتشائم من الرجل العناب ده، عشان اتخانقنا مرتين بسببه".
تصريحات هشام ماجد
وأضاف هشام ماجد قائلًا: "اتخانقنا مرة وهو مسلسل، ومره تانية لما جينا نعمله فيلم، إحنا بنتخانق ونتصالح تمام بس الراجل العناب دايمًا مكلكع، وكان المفروض قبل ما يتعمل مسلسل كان هيكون فيلم وصورنا يوم منه فعلًا، وبعدين اتخنقنا ومكملناش الفيلم وعملناه مسلسل، فأنا خلاص بالنسبالي حابه زي ما هو".
ومن جانب آخر، تحدث هشام ماجد عن كواليس تعاونه كمؤلف مع الفنان أحمد فهمي في فيلم بوشكاش قائلًا: " كنا أنا وأحمد فهمي كاتبين فيلم بوشكاش قبل ما نعرف أن محمد سعد هو اللي هيعمله، ولما عرفت إننا هنعملهوله كانت بالنسبالي فرحة غير عادية، أنا بحبه أصلًا ودخلت فيلم بوحة 3 مرات، وقتها محمد سعد قالنا الفيلم ده مش هيتكتب كده، إحنا نطلع إسكندرية، وطلعنا فعلًا وكان كل يوم يجبلنا سمك وجمبري ونقعد ناكل، لحد ما خلصنا الفيلم".
