هشام ماجد: أنا ودنيا سمير غانم بينا كيميا لإننا صحاب وعمري ما حلمت أمثل
كشف الفنان هشام ماجد عن بدايته في مجال التمثيل، بالإضافة إلى حبه للعمل مع الفنانة دنيا سمير غانم، وتعاونه معها في أكثر من عمل فني، بجانب إلى أزمة الورق التى تمر بها السينما.
تحدث هشام ماجد عن دنيا سمير غانم أثناء لقائه في بودكاست بتاع أفلام الذي يقدمه الإعلامي أحمد كامل قائلًا: " أنا بعتز جدًا بفيلم تسليم أهالي، وبعتز بدنيا سميرغانم، أكتر واحدة بحب أشتغل معها، إحنا كيميتنا ماشية مع بعض عشان في الأصل إحنا صحاب".
تصريحات هشام ماجد
وأضاف هشام ماجد قائلًا: "دايمًا بشوف أن في أزمة ورق وكتابة، يعني إحنا عندنا ممثلين جامدين ومخرجين بيعرفوا بيعملوا كوميديا ودراما، وعندنا مؤلفين جامدين، بس الفكرة أنك تلاقي ورق حلو دي بتاخد وقت، وعشان الفيلم يتعمل كويس لازم يتكتب ويتراجع ويتحضرله كتير".
وعن بدايته في مجال التمثيل وضح هشام ماجد قائلًا: "لما كنا بنعمل رجال لا تعرف المستحيل كنا بنهزر، ومتوقعتش إننا نوصل لكل ده، لأن عمري ما كان حلمي إني أكون ممثل".
وتابع هشام ماجد قائلًا: "مع الوقت بتكتشف مواهب جواك مكنتش عارف إنها عندك، في الجامعة ابتدينا نعمل رجال لا تعرف المستحيل واتنشر أوي، ومن فيلم للتاني فحبينا الشغلانة وبدأنا نشتغل على نفسنا، وإحنا أول ناس تعمل السينما المستقلة بكاميرا فيديو".
ومن جانب آخر تحدث هشام ماجد عن الفنان الراحل سمير غانم قائلًا: "الله يرحمه أستاذ سمير غانم بالنسبة لينا حاجة كبيرة أوي، ونادرًا لما يكون حاجة ليه أنت مش حافظها، ولينا الشرف أنه وافق يطلع معانا ضيف شرف في أول عمل لينا".
