لقاء الخميسي: محدش بيختار دينه وكنت بدور على أبويا في كل الرجالة

تحدثت الفنانة لقاء الخميسي عن العديد من الأسرار حول حياتها الشخصية منها تعرضها للخيانة مرة وحدة فى حياتها، كما كشفت عن رأيها فى الحجاب والنقاب، إلى جانب حديثها عن ديانتها.

تعرض لقاء الخميسي للخيانة

كشفت لقاء الخميسي عن تعرضها للخيانة مرة واحدة فى حياتها، وذلك من خلال لقائها مع الإعلامي تامر شلتوت فى برنامجه In deep، قائلة: "أنا اتخنت مرة واحدة، من شخص أنا كنت عارفة أنه بيعرف بنات كتير، لكن أنا مش بمشي وأنا مريحاه مش لسه هقعد وقول هو عمل ايه، لا أنا أمشي وهو يقعد يفكر كدا ويفكر هو عمل ايه وأنا بختفي، عاقب نفسك واقعد فكر مع نفسك".

وتابعت:  "متخنتش كتير من صحابي لأنى بأخذ بالي أنا بصاحب مين لأني بخاف، وآه فيه ناس جت وضربت من تحت الحزام لكن مش مهمين فى حياتى، لكن في ناس كانوا مهمين عملوا كدا ودخلت فى صدمة واتأثرت، لكن أنا مش برد الإهانة لأني ببقى عارفة نفسي، لو حد عايز حاجة يجى يقولي لكن ما يأذنيش، تعالى قولي أنا عايزة الدور دا نقعد نتكلم لكن تلفي من ورايا دا يخلينى مش عايزة أعرفك تاني".

كما أوضحت فكرة مسامحتها لمن أذوها، قائلة: "أنى أسامح دا هيوجعه أكتر وضميره هيوجعه، وبروح أبارك للشخص وأهنيه وهو بيبقى حاسس بوجع الضمير".

وكشفت عن ما يعجبها فى الرجل قبل الزواج، قائلة: "قبل الجواز اللى كان بيجذبنى أنه يملك أى صفة من صفات والدى، لكن دا مش دائمًا بيبقى كويس لأنى خدت على دماغي كتير، كنت بدور على بابا لحد ما ربنا هداني وقابلت محمد عبد المنصف".

لقاء الخميسي تتحدث عن ديانتها

تحدث لقاء الخميسي عن معتقداتها فى الدين، حيث أننا لا نسأل على الدين الذي نريد أعتناقه ولكن نحن نرث الدين، قائلة: "أنا مخترتش دينى أنا ورثته من أبويا، كان ممكن أصحى ألاقى نفسي مسيحية من أب مسيحي، أنا مخترتش ليه الناس بتعاقبني".

مستكملة: "لو ليا جار مسيحي أنا مابحبوش أعاقبه ليه؟ هو ماله؟ هو صحى لقى أبوه مسيحي المفروض أموته أو ينتحر مثلا، بعتبر أننا كلنا مسلمين ومسيحيين بالوراثة، أنا أقرب حد ليا من صحابى مسيحي".

لتطرق بحديثها حول النقاب مؤكدة أنها لم تقل على النقاب أنه بدعة، كما استشهدت بالآية الكريمة (وليضربن بخمراهن على جيوبهن)، معلقة أنها حتت قماش على الصدر.

حديث لقاء الخميسي عن الحضارة الأشورية

علقت لقاء الخميسي عن تصريحاتها السابقة حول الحضارة الأشورية، قائلة: "أنا قولت أن الحضارة الأشورية هى أقدم حضارة، لكن ما قولتش أنها أهم من حضارتنا المصرية، وعمرى ما قولت أنها الأهم، ومش معنى كدا أني غلطت فى حق حضارتى المصرية اللى بفتخر بيها، ومفيش حاجة تقدر تقلل منها أنا مصرية وبسبوري مصري وفخورة".

لقاء الخميسي ترد على فنانة شابة

ردت لقاء الخميسي على فنانة شابة، سبق وصرحت أنها هى من كانت ستقوم بمسلسل راجل وست ستات، لترد عليها لقاء قائلة: "مش مهم اللى يتكلم يتكلم، المهم مين اللى نجح ومين اللى عمل الدور، الغيبيات دى مش بركز فيها، فى الآخر أنا اللي عملت الدور ونجح مش هى".