ياسمين صبري: لو ثعبان بيخططلي هيقع في شره ويحبني

كشفت الفنانة ياسمين صبري عن المهنة التى تود أن تعمل بها، وعن حبها للأنثى بشكل عام، مؤكدها أنها لاتغضب من تعليقات السيدات، بالإضافة إلى حديثها عن كيفية تفريق الراجل الصادق في مشاعره والغير صادق.

تحدثت ياسمين صبري عن المهنة التى تود أن تعمل بها أثناء لقائها في برنامج الحكاية الذي يقدمه الإعلامي عمرو أديب المذاع عبر قناة Mbc مصر قائلة: " لو مكنتش ممثلة كنت أحب أكون سيدة أعمال أو محامية، وده لأني بالي طويل ومرنة وبعرف أتناقش وأتفاوض".

تصريحات ياسمين صبري

أكدت يا سمين صبري أنها لا تغضب من تعليقات السيدات قائلة: "الست في الطبيعي بتحب كل حاجة حلوة، والطاقة الأنثوية بتحب كل حاجة حلوة، وعين الست بتروح للحاجة الحلوة، وهي بتحب الجمال والشياكة والشكل الحلو حسب امكانيتها، وطبيعي الست تكون عايزة يبقى معاها الحاجات الحلوة".

وأضافت ياسمين صبري قائلة: "أنا بحب الستات أوي وبقدرهم، ولما في ست بتتكلم معايا على طول أشكر فيها، وبفضل أقولها أنتي قمر وريحتك حلوة، فتستغرب وتقولي أنا؟!، ومش بسكت وبفضل أكد على المعلومة إن الست حلوة، وأصلًا دي صدقة وجبر للخواطر، وبتعُدلك في رزق وسعادة وجمال دي فلسفتي".

وتحدثت عن تعليقات بعض المتابعين لها عن ثروتها الكبيرة قائلة: "هما عارفين أنا عندي كام في البنك؟..كله بيقول هي لحقت تعمل كل ده امتى، وتجيب كل ده امتى من لبس وشنط، الطيارة الخاصة مش بتخلي الإنسان محصلش ولا بتعمل إنسان، أنت اللي بتعمل قيمة للحاجة مش أكتر".

وتابعت ياسمين صبري قائلة: " مش كل الناس بتقدر تكلمني، بيخافوا ويقولوا مش قدها وهعملهم إيه وهقدم لهم إيه، وبيبدأ يهتز، أنا أسفة أني بقول كده بس كل ست عارفة إمكانية تأثيرها، يعني لو ثعبان جاي يخططلي هيقع في شره ويحبني، وأنا مش بقول كده عشان الشكل، بقول كده عشان أنا بنت بلد وهادية ومش سبور".

كما أشارت ياسمين صبري إلى أنها من السيدات المحافظة، وأن هذا النوع يقل مع مرور الوقت، وأنها لا تكون صداقة مع الرجال قائلة: "معنديش أصحاب رجالة، أخاف الموضوع يقلب مشاعر، وأنا مش حاسه أني عايز حاجة".

ومن جانب آخر، فرقت ياسمين صبري بين الراجل الصادق في مشاعره والغير صادق قائلة: "لو حب الشئ اللي بره يبقي حب اللي جوه، الطبيعي أن الشئ اللي بيلمع يجذب ناس كتير جدًا، ولكن الشعور هو اللي بيأكد ده حقيقي ولا لأ، وكل ست جواها سينسور بتكون عارفة الحقيقة، وهل الراجل ده منبهر بيها من بره بس ولا لأ".