نجلاء بدر: بقالي فترة مش بتعاكس وستات المناطق الشعبية قادرين
كشفت الفنانة نجلاء بدرعن رأيها في المرأة وعن بعض صفاتها وأنها نكدية، بجانب فكرة الزواج والبقاء في المنزل دون عمل، وذلك أثناء لقائها في برنامج Girl's Space.
تصريحات نجلاء بدر
-الست نكدية أكتر من الراجل، وده عشان احنا مخزون للمشاعر بنخزن الأحزان وبنستدعي النكد.
-الراجل بطبعه فرفوش ومش بيحب المشاكل.
-بقالي فترة كبيرة مش بتعاكس، ومش فاكرة كلمة اتقالتلي وقت المعاكسة.
-الستات اللي في المناطق الشعبية قادرين، وبتكون ست بمليون راجل.
-في مرة كنت بصور في منطقة شعبية ولقيت ستات كتير لابسين عبايات سودة مطرزة وحاطين مكياج، سألتهم رايحين فرح؟.. قالولي لا رايحين يضربوا واحدة في شارع تاني.
-الست اللي في الأرياف ضعيفة، وبتخاف تعترض أو تعلي صوتها.
-أكتر موقف مش مفهوم بالنسبالي، وحسيت فيه إني ست قادرة ومش قادرة، وقت وفاة والدي.
-بعد وفاة والدي حسيت بتركيبة غريبة، وقتها حسيت إني مش قادرة أكمل من غير وجود والدي اللي كان بيمثلي الضهر والسند، وقادرة لأني لازم أقف، لأنه علمني أقف على رجلي.
-المرأة عدوة نفسها، احنا اكتر ناس بتجرح وتضايف نفسها، يعني واحد عايز يسيبك تفضلي تكلميه؟!.
-المجتمع بيغفر للست الحلوة، الست الحلوة معاها شهادة مسامحة ومرور.
-حتى الستات بتعمل حساب للست الحلوة.
-أنا ضد مثل "ضل راجل ولا ضل حيطة"، مش قادرة أصدق أصلًا أن الراجل يوافق يتشبه بالحيطة.
-أنا بحب الرجالة، ومهم أنهم يكونوا موجودين في حياتنا.
-أنا اختار ضل الحيطة عشان هي مش هتقع ومش هتتعب وتسيبني.
-وضد مثل "الراجل ميعبوش غير جيبه"، لأن ممكن يبقى معاه فلوس الدنيا بس عشرته صعبة، الراجل آخر حاجة تعيبه جيبه.
-الجيب مش هيعوضني عن خفة الدم.
أعمال نجلاء بدر
يذكر أن نجلاء بدر تشارك في مسلسل "صوت وصورة" بطولة الفنانة حنان مطاوع، محمد كيلاني، مراد مكرم، نجلاء بدر، ولاء الشريف، صدقي صخر، وليد فواز، وغيرهم الكثير من الفنانين، والمسلسل من تأليف محمد سليمان عبد المالك وإخراج توبة.
كما شاركت نجلاء بدر في مسلسل سره الباتع، الذي عرض في موسم مسلسلات رمضان 2023، وتدور أحداث المسلسل في إطار درامي حول السلطان حامد البطل الشعبي والمجاهد وقت الحملة الفرنسية، ليتحول لأسطورة لها مقامات في العديد من القرى، وفي ذات الوقت يكرس حامد حياته لكشف سر السلطان ، ليجد نفسه هاربًا من عصابات الآثار.
وشارك في المسلسل مجموعة من الفنانين ومنهم أحمد فهمي، ريم مصطفى، حنان مطاوع، أحمد صلاح السعدني، أحمد عبد العزيز وغيرهم العديد من الفنانين، والمسلسل من تأليف يوسف إدريس وإخراج خالد يوسف.
