اتمنيت ربنا يريحه.. منال الصيفي تكشف تفاصيل مرض أشرف مصيلحي وأيامه الأخيرة
![منال الصيفي وأشرف](/UploadCache/libfiles/1/8/600x338o/529.jpeg)
كشفت المخرجة منال الصيفي عن تفاصيل مرض زوجها الفنان الراحل أشرف مصيلحي حتى وفاته يوم 17 سبتمبر، وذلك بعد صراع طويل مع مرض السرطان استمر حتى 3 سنوات.
تحدثت منال الصيفي عن بداية مرض أشرف مصيلحي أثناء لقائها في برنامج كلمة أخيرة الذي تقدمه الإعلامية لميس الحديدي المذاع عبر شاشة قناة ON قائلة: "أول مرة لاحظنا ده كان وقت تصوير مسلسل جمال الحريم، لقيته لخبط في الكلام واتفاجأت أنه مش مجمع ولا مركز، ومش عارف يحفظ النص، وكان بيقولي أنا أسف والله، قولتله وقتها معلش هنذاكر سوا وحفظته الدور بصعوبة، تخيلت أنها مجرد جلطة بس ".
تصريحات منال الصيفي
وأضافت منال الصيفي قائلة: "كل ده حصل في آخر أيام في التصوير، طلبت منه أنه يروح لدكتور وكان معانا ماجد يوسف، لأني كنت في التصوير ومقولتش للأولاد، لما رحنا للدكتور قاله ده ضغط عصبي وكتبله مهدئات ليومين، بس أنا معجبنيش وفي حد من صحابه نصحه يروح لدكتور متخصص، ولما رحنا للدكتور طلب إشاعة وعملناها، وبعدين لقيته بيكلمني بيقولي انتي بتسوقي العربية، وقالي احنا شاكين في ورم أو جلطة يا نزيف".
وتابعت قائلة: "خلال هذه الفترة عرضت الأشعة لدكتور متخصص وقالي لازم يتعمل جراحة عشان في كيس مياه على المخ".
ووضحت منال الصيفي عن حقيقة أخفائها لمرض أشرف مصيلحي عنه قائلة: " قررت أني مش هقوله بالمرض عشان هو كان بيخاف وجبان من الجزئية دي، وبيخاف علينا قوي من وقت الكورونا، جالنا أنا وهو كورونا ومكنش خايف على نفسه، كان خايف أكتر عليا أنا".
![](/Upload/libfiles/1/8/526.jpeg)
وأشارت منال الصيفي عن أول صدمة لها قائلة: "أول صدمة أخدتها لما عرفت أنه عنده سرطان في المخ وشرس كان من الدرجة الرابعة، وعمل جراحة وبقي كويس شوية لحد ما توفت والدته، جاتله جلطة فأثرت على الحركة والكلام، وقولت للأولاد بعد شهر من المرض، وأنا وقفت شغل لمدة سنة وعملت غرفة رعاية مركزة في البيت".
وقالت منال الصيفي عن أصعب اللحظات: "كان أصعب لحظات لما الدكتور قالي مرتين أنه بدء العد التنازلي لوفاة وأن حالته الصحية تدهور، وطلب منها إشاعات كتير، والسبب أنه كان عايز يطمن وقالي ممكن تفرق في حياته 8 شهور، من وقت ما تعب كنت كل يوم أقرأ سورة ياسين، وفي أخر أيامه كنت بقول يارب كفاية عليه كده هو تعب قوي".
![](/Upload/libfiles/1/8/528.jpeg)
واختتمت منال الصيفي قائلة: "أنا مهما عملت عشانه مقدمتش حاجة زي اللي هو قدمه لأبويا وأمي اللي عاشت معانا 10 سنين بعد وفاة والدي، واللي شاله وقت مرضه".