ركين سعد: "مصر احتضنتني وشعبها طيب وبيحب النُكتة"

كشفت الفنانة الأردنية ركين سعد عن إقامتها في مصر وعن مدى حبها وامتنانها لشعب مصر، بجانب حديثها عن كواليس دورها في مسلسل سفاح الجيزة، الذي حقق نجاح كبير عبر مواقع التواصل أثناء عرضه على منصة شاهد مؤخرًا.

وتحدثت ركين سعد عن إقامتها في مصر أثناء لقائها في برنامج ضيفي الذي يقدمه الإعلامي معتز الدمرداش المذاع عبر قناة الشرق قائلة: "أنا بقالي سنتين مقيمة في مصر، أول مرة جيت مصر كانت في 2017 كان في مسلسل واحة الغروب، ورجعت تاني في 2021 يعني بقالي سنتين".

تصريحات ركين سعد

أعربت ركين سعد عن حبها لمصر قائلة: "الحب اللي حساه تجاه مصر كبير، لأنها البلد اللي احتضنتني وحبتني وأدتني فرصة، وأنا ممتنة جدًا لوجودي في مصر وبعتبرها بلدي التانية".

وأضافت ركين سعد عن شعب مصر قائلة: "الناس على طبيعتها وبتتكلم وتعبر من قلبها، من وقت ما جيت مصر في 2017 والناس بتحسسني أني منهم ومش غريبة عنهم، وي حاجة بتأثر فيا أوي، شعب مصر جميل وبيحب النُكتة، هو شعب طيب والناس فيه صادقة، الحاجات دي بتخلي اللي جاي من بره يحس أنه جاي لبلده وأهله، وده غير أن مصر فيها حياة حماسية، والطاقة اللي فيها مختلفة جدًا، هي بلد ضخمة وعريقة".

ووضحت ركين سعد عن مشوارها الفني بعد نجاح مسلسل سفاح الجيزة قائلة: "هي رحلة وأنا دايمًا بشوف أني لسه معملتش حاجة، أنا بمثل من 2010 وبشتغل على نفسي وبحس أن في حاجات كتير لسه عاوزة أقدمها، هو مشوار طويل وصعب مش سهل، والشخصيات كمان ساعات بتكون صعبة وظروف الشغل صعبة خاصة أن ساعات كتير مش بتكون مع أهلك واصحابك عشان التصوير، وده بيكون صعب بس بحاول أعمل توازن عشان فكرة البعد عن عيلتي وأهلي صعبة، ده غير أن المهنة نفسها صعبة".

وأضافت ركين سعد قائلة: " مرة كنت بعمل ورك شوب ومدربة التمثيل قالتلي لوعندك حاجة تانية شاطرة فيها روحي اعمليها، لأن المهنة دي صعبة لو مش بتحبيها أوي وعندك شغف ليها بلاش تكملي، وده لأنها مهنة صعبة مش سهلة".