هيدي كرم: بنتعرض للإرهاب على السوشيال ميديا وكرامتنا مش لعبة

وجهت الفنانة هيدي كرم رسالة إلى منتقدي الفنانين على مواقع التواصل الاجتماعي، مشيرة أن المشاهير والفنانين يتحملون إهانات كثيرة.

نشرت هيدي كرم مقطع فيديو عبر صفحتها الرسمية على موقع تبادل الصور والفيديوهات انستجرام معلقة: "احنا اتهرينا والله كمشاهير، وأنا بتكلم بالنيابة عن مشاهير كتير وخاصة ستات زي، اتهرينا من التهزيق والشتيمة وقلة القيمة، والإرهاب على السوشيال ميديا وانكم تحسسونا إننا منسواش، اتهرينا من إننا نتهان ونتشتم والله حقيقي هو مفيش من الأحمر، مفيش دم وإحساس".

رسالة هيدي كرم لجمهورها

وأضافت هيدي كرم قائلة: "الناس اللي بيشتمونا على السوشيال ميديا واحنا طالعين واحنا نازلين، واحنا بنحاول نعمل محتوى وفيديوهات لذيذة، واحنا بنحاول نعمل طاقة إيجابية، أنا بذاكر السوشيال ميديا عشان أشوف إيه اللي ينفع لقيت مفيش حاجة نافعة، لابسين لابسين ومتهزقين ومشتومين ووحشين".

هيدي كرم توجه رسالة لجمهورها 

وتابعت هيدي كرم قائلة: "صدقوني الناس اللي بتشتمنا لو شتمناهم بنفس الشتيمة هينتحروا تاني يوم، احنا عندنا جهاز عصبي قوي جدًا لأنا منحسين ومستحملين ومش بنرد، لكن صدقوني لو اتشتموا واتهانتوا  بنفس الإهانة والله العظيم هتقطعوا شراينكم، وهتحسوا بكم الاضطهاد والإهانة والمهانة، ولكن احنا مش هنعمل كده عشان احنا محترمين وحساسين ومؤدبين، وبنقدر مشاعر الآخر اللي هي مش عندكم".

واختتمت هيدي كرم قائلة: "كده كتير شوفولكم لعبة تانية عشان احنا كرامتنا مش لعبة قي إيدكم، بالراحة علينا كل واحد عنده مشاكل ومآسي وأزمات في شغلة وناس فقدها، وأزمات عائلية وصحية وعاطفية واجتماعية، رجاء محبة تخفوا على بعض شوية، احنا مفيش بينا وبينكم طار ونجحنا مش معناه فشلكم، وممكن كل الناس تنجح، أرجوكم بالراحة على اخواتكم الفنانين الطيبين المبدعين الحلوين اللي بيعملولكم حاجات حلوة".