أسما شريف منير: "خايفة من الموت مش عارفة هقف إزاى قدام ربنا وانتظمت في الصلاة بعد أحداث غزة"
تحدثت أسما شريف منير عن الانتقادات التى توجهه لها، منذ أن قامت بحلق شعرها أمام متابعيها على "إنستجرام"، والذي زادت بعد أن بدات الحديث عن القضية الفلسطينية وأراءها في تلك الحرب.
تحدثت أسما شريف منير خلال بث مباشر على صفحاتها الشخصية بموقع "إنستجرام"، وردت على كمية الشتائم والانتقادات التى تتعرض لها، قائلة: "هى الناس اللى بتشتم دى ما تعلمتش حاجة، يعنى انت لما بتشتم كدا أنت بتاخد حسنات، أنت كدا دكر ومحصلتش يعنى؟.. بتتعلم إيه وبتعلم اللى حواليك إيه، ربنا يهديهم وأنا ولا بفكر فى الناس دي".
كما تابعت أسما شريف منير، رأيها في منتقديها، قائلة: "أنا اللى بيزعلني أن اللى بيشتم دول ناس مدعيين، تدخل عندهم تلاقي كاتبين لا إله إلا الله، وفلسطين حرة دول ناس كدابين ومش حقيقين، الناس مبقاش عندها دم وكمية نفاق وكدب وانفصام في الشخصية رهيبة، لو أنت مسلم أو مسيحي فالديانتين بينادوا بالاحترام، لما تصدر دا للناس يبقى ما تستغربش لما يقولوا علينا همج".
كما قالت مدافعة عن نفسها، قائلة: "أنا مش شيخة أنا إنسانة نفسي أتعامل مع بني أدمين طيبين، والدين أخلاق سواء مسلم أو مسيحي، واللي الناس بتعمله دا مش منطقي، لازم نتعلم منبقاش همج ونعمل اللي دينا قالنا عليه واللى نقدر عليه، أنا مش محجبة وبعمل حاجات غلط، واللى بيحصل دا لازم يعلمنا حاجة، بلاش إدعاء وتوكلوا نفسكم إنكم تربوا الناس، ظبط نفسك الأول وشوف الطريقة اللى المفروض تكلم بيها الناس، ولو عايز تساعد في هداية حد تتكلم إزاى".
واستكملت أسما: "يعني المفروض تقوله ده الدين حلو قوي وافتح نفسه على الدين، ولو أنت شايف إني مش مسلمة وطلعتني من الديانة، هل علشان أدخل تاني الإسلام شايف أن دي الطريقة اللي تدخلني بيها تاني؟.. يا جماعة والله العظيم ما ينفع اللي بيحصل ده، والله في ناس مافيش فيها فايدة وموجودين علشان نتعلم أن منبقاش زيهم، أنا مش زعلانة إنهم بيشتموني أبدًا ومحصنة نفسي منهم، اللي مزعلني أن في ناس فعلًا بيصدقوا نفسهم لدرجة الجنان وشايفين أنهم صح".
تعليق أسما شريف منير على القضية الفلسطينية
كما وجهت أسما شريف منير حديثها عن ما يحدث في فلسطين، وما يلاقيه أهالي غزة على يد قوات الإحتلال الوحشية، قائلة: "اللي بيحصل ده ليه سبب على أصعدة كتير قوي، والإسلام بان قد إيه في ناس طيبين وقد إيه ناس بتخاف على بعض، وقد إيه حبنا للبلد، بشوف على أكونتات كتير ناس بتحاول تساعد وتعلي صوتنا، وفي ناس بتتريق وتعمل ميمز بتضحك، وفي ناس بتشتم وناس بتحبط ناس بتحاول تعمل حاجه".
كما وجهت أسما شريف منير نصيحة لمتابعيها: "لو اللى بيحصل دا معلمناش حاجه يبقى نبطل ندعي، اللي بيحصل ده بينعكس علينا في حياتنا، ولازم اللي مبيصليش يحاول يرجع يصلي الالتزام صعب، واللي بيبقى عنده نقمة على البلد بتاعته أو أي حاجة بتحصل في سياستها لازم يحمد ربنا أن أنت عندك بلد وجيش بيحميك".
