لبلبة: "أحمد زكي كان معترض عليا في ضد الحكومة وعاطف الطيب راهن عليا"

تحدثت الفنانة لبلبة عن تفاصيل تعاونها مع المخرج الراحل عاطف الطيب والفنان الراحل أحمد زكي في فيلم “ضد الحكومة”، مشيرة إلى أن المخرج عاطف الطيب راهن على نجاحها.

قالت الفنانة لبلبة في تصريحات تلفزيونية: “انطلاقتي كانت من فيلم ضد الحكومة مع أحمد زكي والراحل عاطف الطيب، ومن حظي أن عاطف الطيب كان بيحب يطلع النجوم اللي معروفين ويغير في الأدوار، وشافني في مهرجان كان وأقل من شهرين جيت مصر والمنتج سعد شنب كلمني وقالي في دور مرشحك فيه عاطف الطيب مع أحمد زكي، ولما قرأت الدور خوفت لإني كنت بقول كلام جرئ، وأحمد زكي لما عرف إني هعمل دور المحامية قال على عيني وراسي بس لبلبة هتعمل الدور ده؟.. عاطف الطيب قاله هتشوف، وكان متأكد انه هيكسب الرهان”.

تفاصيل تعاون لبلبة في فيلم ضد الحكومة

وتابعت لبلبة: “فيلم ضد الحكومة كان أول عمل يجمعني بـ أحمد زكي، وكنا بنصور في المحكمة وشغل صعب، وطلب مني أستاذ عاطف إن عيني تدمع والدمعة متنزلش في جملة معينة، والدمعة تنزل في جملة تانية، وقولت يا رب ساعدني إزاي هعمل كدا لإن ممكن الدمعة تنزل غصب عني، وكان مشهد صعب جدًا، وعملته من أول مرة ووافقوا عليه ولكن أستاذ عاطف مقالش برافو، سألت أحمد قولتله هو أنا كنت كويسة؟، قالي أنتي مشوفتيش عملتي إيه؟، أنتي عملتي مشهد عبقري”.

واختتمت لبلة حديثها قائلة: “أنا كنت شايلة هم ليه الأستاذ عاطف الطيب مقالش برافو، ورجعت البيت يومها معيطة وحكيت لأمي اللي حصل وقولتلها الظاهر أنه خد مقلب فيا، وأنا مش عجباه، قالتلي مش هتقدري تكملي تصويرك طول ما انتي مش مرتاحة، أسأليه، فسألته وقالي طالما قولت اللي بعده يبقى أنا موافق على المشهد".

اقرأ أيضًا:"كنت هفقد إيدي".. محمد مرزبان يكشف تفاصيل حالته الصحية بعد حجز 17 يوما