بسمة وهبة تتقدم ببلاغ ضد مادلين طبر بعد تصريحاتها عن عادل إمام

هاجمت الإعلامية بسمة وهبة في حلقة اليوم من برنامجها "90 دقيقة" المُذاع عبر قناة المحور، الفنانة مادلين طبر، وذلك بعد تصريحاتها الأخيرة في المهرجان القومي للمسرح المصري، والتي تحدثت فيها عن الزعيم عادل إمام.

قالت بسمة وهبة: "النهاردة شوفت بوست سيئ جدًا وعصبني على المستوى الشخصي، الفنانة مادلين طبر قالت كانت أمنيتي إن عائلة الزعيم عادل إمام تفرج عنه، وتخليه يحضر تكريمه في المهرجان القومي للمسرح، وكنا هنستقبله على رموش عينينا، لكن رامي ابنه مش بيرد خالص على حد، طيب نطمن عليه إزاي، لازم نقتحم الفيلا؟، وبالنسبة للناس اللي اقتحموا بيته وعرفوا يعملوا عيد ميلاده برافو عليهم".

بسمة وهبة تهاجم مادلين طبر

وعلقت الإعلامية بسمة وهبة قائلة: "ده بوست صادم جدًا بالنسبة ليا، وأعتبره لا يليق بمكانة فنانة، وهي بكلامها ده تسيء للفن اللي هي محسوبة إنها جزء منه، يعني إيه عائلة الزعيم تفرج عنه، مين قال ليكي إنهم مكتفينه وحابسينه، وإنت مالك؟ إنتي تعرفي منين؟، يحضر المهرجان أو لأ إنت دخلك إيه؟ ورامي ابنه يرد عليكي ليه، هو إنتو أصحاب؟ وهل إنتي من جيل الزعيم أصلا؟ إنت محسساني ليه إنك بنت خالته".

وأضافت: "وبعدين إنت عارفة إن كلمة لازم نقتحم الفيلا دي انتي ممكن تتحاسبي عليها قانونيًا، إنت بتدعي الناس انها تقتحم منزل الزعيم عادل إمام؟ إنت فاكرة نفسك رايحة تقتحمي عشة فراخ؟ أنا دلوقتي ومن مكاني هذا بقدم فيكي بلاغ إنك بتحرّضي الناس لإقتحام الفيلا، دي دعوة غير قانونية ابدًا".

واستكملت حديثها قائلة: "وبعدين مين قالك إن في ناس اقتحموا بيته وعملوا له مفاجأة، إنت تعرفي هما بالنسبة له إيه؟ إنت بتتكلمي عن الفنانة يسرا والفنانة لبلبة عشرة وأصدقاء عُمر بالنسبة له، إنت ليه حاشرة نفسك وإنت مش في نفس المكانة معاهم".

واختتمت بسمة وهبة حديثها وقالت: "هذا الكلام مينفعش يتقال في حق الزعيم، الفنان عادل إمام له مكانة كبيرة في مصر والعالم العربي كله".