نجوى فؤاد: الرقاصة لو محتشمتش تبقى رخيصة
كشفت الفنانة والراقصة نجوى فؤاد في تصريحات تلفزيونية أنها لم تعتزل الرقص الشرقي، وقالت: "إحنا للأسف مبقاش عندنا رقص شرقي في مصر، واللى بنشوفه دلوقتي عبارة عن عري فقط من الراقصات الأجنبيات".
تصريحات نجوى فؤاد
كما تحدثت الفنانة نجوى فؤاد برأيها عن ما يحدث في الساحل الشمالي الفترة الأخيرة قائلة: "السوشيال ميديا أصبحت تحمل فسادًا كبيرًا والساحل الشمالي فيه بعض الأماكن دلوقتي بقت كباريه درجة تالتة والروسيات بوظوا المصريات، وربنا قال احتشموا وإحنا شعت ليه عاداته وتقاليده اللي لازم نلتزم بيها، والرقاصة في رأيي لو محتشمتش تبقى رخيصة، وللأسف كله دلوقتي بقى عريان وملط ومش عارفة ليه دا إحنا مصريين ولينا ديننا وتقاليدنا اللي لازم نحترمها".
وأكملت نجوى فؤاد حديثها عن العري المنتشر في فن الرقص الشرقي في الفترة الأخيرة: "مبقاش فيه رقص شرقي في مصر ولكن فيه روسيات بيرقصوا رقص تدريبي، مجرد إنهم بيأدوا اللي اتعلموه لكن مفيهوش الروح ولا الشرقية بتاعتنا، والعري الزيادة عن اللزوم ده لازم يكون فيه رقابة زيادة شوية عليه".
وفي سياق آخر، قد سبق وتحدثت الفنانة نجوى فؤاد عن أخبار اعتزالها الفن، وذلك بعد غيابها عن الوسط الفني خلال الفترة الماضية، وأوضحت أنه كان بسبب إصابتها بالانزلاق الغضروفي، وطالبت جمهورها بالدعاء لها بالشفاء العاجل.
