فريدة سيف النصر تعاتب نقابة المهن التمثيلية: نفسي تعبروني
عاتبت الفنانة فريدة سيف النصر نقابة المهن التمثيلية، بعد انتهاء افتتاح مهرجان القاهرة للدراما، أمس في مدينة العلمين، وذلك من خلال رسالة وجهتها لهم عبر حسابها الرسمي على موقع التواصل الإجتماعي فيسبوك، أشارت فيها بطريقة فكاهية أنها كانت تتمنى التكريم من نقابتها.
حيث عبرت الفنانة فريدة سيف النصر عن رأيها في المهرجان والتكريم قائلة: "نفسي نقابتي تكرعني، وهما عارفين كل حاجة وشاطرين جدًا وبقوا مهمين قوي، والله العظيم فرحانة من قلبي للي اتكرموا هذه نقرة وتلك نقرة أخرى، مليار مبروك لكل اللي بيتكرموا في مهرجاننا اللي بعترف بيه فقط، واللي نقيبنا حبيبي أخرج لي مسرح وهو زميل عمر وحبيبي هو وزوجته جدًا.. ويأكد بنفسه الحضور للمهرجان أكتر من مرة، وقلت له المرة الأولى هو أنا مش معاكم ولا إيه بقى كل الناس دي وأنا مش وسطهم نهار إسوح ده أنا مرات أبو حد ومعرفش".
رسالة فريدة سيف النصر لنقابة المهن التمثيلية
وأكملت الفنانة فريدة سيف النصر: "بس الحقيقة أنا مش معاهم لأ، أنا مع نفسي بس، وعارفة إني محسوبة عليه ولا بيكرم ماجدة ولا روجينا ولا فريدة طيب ادعوا لي بقى والنبي أبقى ممثلة كبيرة وابقى شاطرة وليا جمهور وقبول وأفلام ومسلسلات بحق، ومسرح مش أي أي، عرفتم مجيتش ليه بحس قلب الأم.. يارب نفسي يكرعوني معاهم ولو مرة، نفسي اتكرع".
وتابعت فريدة سيف النصر: "مع العلم إني والله بعتذر لمعظم المهرجانات التي بلا سبب ومش بعتبرهم فنانين علشان يكرموا فنانين.. بس الظاهر إنهم طلعوا بيفهموا.. أما بتوعنا ندعيلهم بقى ربنا يقويلهم البصر والبصيرة والقلب يا ولاد القلب مهم قوي والإنسان عبارة عن سيرة في حياته وبعد مماته، طيب كنتوا استلفوا ريبورت لميس الحديدي ولا إسعاد يونس ولا إيمان الحصري ولا عمرو الليثي.. كنتم هتعرفوا أي شوية هبل من اللي بعمله مع كتاب ومخرجين وأبطال على قد حالهم ولا ملقيتهمش برضو، لو بيفهموا يعني إيه تكريم كانوا جابوا من أول الحكاية لازم فن وإبداع وسمعة واستقامة وتواضع".
واختتمت فريدة سيف النصر حديثها قائلة: "ما هو مش معقول ننسى أشياء ونبروز أشياء أخرى، هعمل لكم فيلم الماضي لا يموت، وأنا مقررة إني أقول اللي بحسه أيًا كان في وش الجدع مقولتش التخين علشان أنا أصلًا بلوظة هييه.. دنيا فونيا والزمن كباس، يوووه عن إذنكم أصلي سايبة صينية الكوسة وريحتها طلعت إن شاء الله ألحقها ما أنا طباخة شاطرة، بس ممثلة فاشلة، حقيقي والله أنا فعلًا مبعرفش أمثل لو محستش مبشتغلش لازم تلبسني وأهو أديهم بيلبسوني بعد مسمعتش من زميل إني متكرعة هههههه سحبوها تاني، بصوا يا جماعة، الساكت عن الحق شيطان أخرس، وأرجوكوا غيروا الماء الراكد عشان بيعفن".
