شريف منير يرد على هجوم الجمهور لابنته: بصوا على نفسكوا الأول وهى مضرتش حد

رد الفنان شريف منير على الانتقادات الموجهه ل ابنته أسما شريف منير بسبب حلق شعرها على الزيزو، مؤكدًا أنه معجب بإطلالتها.

نشر شريف منير فيديو على موقع تبادل الصور والفيديوهات إنستجرام معلقًا: "إيه الضجة والدوشة اللي انتوا عاملنها دي، كل ده عشان بنتي قصيت شعرها قدام الكاميرا.. إيه الغلط في اللي هى عملته، ده تصرف عادي مفيهوش حاجة يعني، واوعوا تفكروا إني هاجي على بنتي عشان رضاكم، دي بنتي اللي بحبها ومليش غيرها ".

تعليق شريف منير على حلق ابنته أسما شعرها

كما  أعرب شريف منير عن إعجابه باللوك قائلًا: " بالمناسبة اللوك اللي أسما بنتي عملته عاجبني جدًا وأنا مبسوط منها قوي، وقبل ما السادة الإخوة الملايكة الصالحين اللي بيقلوا أدبهم ويشتموا ويقولوا جاتها البلاء في شكلها وأبوها معرفش يربي وتاخد التريند، لا أنا بنتي متربية كويس جدًا، وبتتصرف باللي حاسة بيه المهم أنها مش بتأذى حد".  

وأضاف شريف منير قائلًا: " قبل ما تتكلموا على تربية بنتي بصوا على نفسكوا الأول واتفرجوا على عيلتكم وإخواتكم والناس اللي حواليكم قبل ما تغلطوا وتنتقدوا وتقولوا متربتش ب3 تعريفه، لا أنا بنتي متربية كويس جدًا كمان".

تابع شريف منير قائلًا: " أنا بحب أكل الرز والسمك بإيدي حتى في أفخم المحلات، تفتكروا دي قلة أدب مني ولا مفيش إتيكيت، وعلى العموم ريحوا نفسكوا اللي حصل من بنتي مش عيب، هي مغلطتش فى حد فيكوا، وبعدين هى عندها 36سنة وأم وعندها بنت، ومسئولة عن نفسها، وأنا أب مسئوليتي إني أحميها، عايز أقول أسما انتي شكلك زي القمر يا حبيبتي وخدتي التريند برافو عليكي، متسمعيش ومتهتميش بكلام حد، أنا مش مهتم بالكلام اللي تقال عليها وعليا المهم أننا مش بنضر حد.. سلام عليكم".

آخر أعمال شريف منير

يعتبر آخر أعمال شريف منير مسلسل “إيجار قديم” والذى تم عرضه منذ فترة، حيث قدم في المسلسل شخصية جديدة له وهي مدرس على المعاش ويحدث بينه وبين جيرانه العديد من المواقف الإنسانية وبعض المواقف الكوميدية، كما شارك في المسلسل العديد من الفنانين الكبار ومنهم: محمد الشرنوبي، صلاح عبد الله، شريف منير، ميمي جمال، حازم سمير، فيدرا، كما أن المسلسل من تأليف عمرو الدالي وإخراج طارق رفعت.