أنغام: طفولتي كانت صعبة ومريت باكتئاب لفترات طويلة

كشفت الفنانة أنغام عن مرحلة الطفولة الخاصة بها، مؤكدة أنها كانت صعبة للغاية، إلى جانب حديثها عن تعرضها للاكتئاب وعن رأيها في الإعلام حاليًا.

وتحدثت أنغام عن طفولتها أثناء لقائها في برنامج AB talks قائلة: "بعد ما شوفت أبويا وهو بيضرب أمي وأنا طفلة مبقتش أسلم عليه ولا أبوسه حتى، وبعمل ده وأنا مرتاحة، وبقيت أحس إن عليا مسئولية إني أحمي أمي طول الوقت".

تصريحات أنغام

قالت أنغام: "بشوف نفسي محظوظة، ولكن في البيت مكناش أسرة سعيدة، وكانوا بيتعاملوا معايا على أني كائن كبير وفاهم، وكنت بشيل حاجات مكنتش عايزة أشيلها، وأنا استوعبت حاجات مكنتش عايزة استوعبها أب وأم مش سعداء مع بعض والأم مش محبوبة من الراجل كفاية، وده كله بينعكس على الطفل اللي في البيت".

وتابعت أنغام قائلة: "سألت أمي ليه كملتي مع أبويا بعد ما ضربك، كان ردها عليا هروح بيكم فين أنتوا الأتنين وهروح فين، أنا مشفتش أمي سعيدة يوم، لومتها بقسوة وهي مكنش ليها ظهر من أهلها، كمان أخويا ملحقش يشوف أخت عادية في البيت، هو ابتدأ يوعى وأنا كنت مسئولة ومشهورة، أنا مدياله العذر في كل حاجة".

أنغام والموسيقى

أشارت أنغام إلي حبها للموسيقى قائلة: "أنا اتعلمت الموسيقي من وأنا عندي 6 سنين، وكنت بلعب بيانو وأنا صوابعي متكسرة من البرد"

وأضافت أنغام قائلة: "الموسيقى هي حياتي، وهي طريقة تعبيري واحساسي، وبحب الشهرة في النجاح، لكن مش بحبها في حاجات تانية وتعامل الناس معاها".

وأعربت أنغام عن رأيها في الإعلام حاليًا قائلة: "أنا ممتنة جدًا للإعلام اللي أنا خرجت منه في بدايتي، لكن الإعلام الحالى أنا بتأقلم عليه عشان جاية من زمان مختلف، وأنا مش بحب أشوف نفسي ضعيفة ومهزومة ومش بعرف أبين ده، مريت بحالات اكتئاب كتير في سنين كتير، وقعدت سنين كتير بأخد أدوية بسبب الاكتئاب، وكنت منفتحه عاطفيًا وده كان غلط في تجربتي".

آخر حفلات أنغام

أحيت الفنانة أنغام مؤخرًَا حفل فى مدينة العلمين ضمن فعاليات مهرجان العلمين الجديد، وسط تفاعل جمهور كبير وقدمت مجموعة من أغنيها المميزة ومنها “ ازاى بس يا شبر ونص، مجبش سيرتي، حالة خاصة" وغيرهم من الأغاني.