عمرو سلامة: انفصلت لإني مبقتش مناسب لمتطلباتها ومقدرش أعيش شهر سينجل

كشف المخرج عمرو سلامة عن عدد من الجوانب حول حياته الشخصية، كما تحدثت عن كواليس طلاقه الأول الذي حدث بسبب تغيير شخصيته بشكل كبير، إلى جانب حديثه عن علاقته بزوجته الحالية.

قال عمرو سلامة خلال لقاءه في برنامج "The you in human": "لما حصل طلاق أول مرة كانت علاقتي بزوجتي كويسة جدًا، وعمرنا ما اتخانقنا لكن لما قعدنا نتكلم وسألتها لو كنتي قابلتيني لأول مرة من 7 سنين بشخصيتي النهاردة كنتي هتتجوزيني؟ قالتلي لأ، ساعتها فهمت إني مبقتش مناسب لمتطلباتها، لسه بنحب بعض بس خلاص مش هينفع، ولو حد كسر العقد اللي كان بينا يبقى أنا، لأني اتغيرت كتير عن الشخص اللي كنت عليه قبل الزواج".

عمرو سلامة: أنا شخص مش بيتخانق

أما عن الفرق بين زواجه الأول والثاني، أضاف: "الفرق بينهم إني في الأول مكنتش بتخانق خالص وبرضو مش بقول على الحاجات اللي بتضايقني في شريك حياتي، لكن دلوقتي في جوازتي التانية مش بتخانق برضه لكن أي حاجة بحس إنها ممكن تسبب مشكلة لازم أتكلم فيها مع شريكتي".

وعن عيوبه، قال عمرو سلامة: "من أهم العيوب اللي بشوفها في نفسي مع إن الناس مش بتشوفه عيب خالص، هو إني شخص مش بيتخانق حتى في الشغل مش شخص عنيف ومش بكبر الأمور، ممكن ساعات بيكون فيه توقيت سنوي كده بفقد أعصابي وبندم بعدها سنة لحد ما أنسى، وأوقات كتير اللحظة دي بتطلع في الشغل بكون وحش كاسر".

تصريحات عمرو سلامة

وأكد عمرو سلامة، أنه كان لا يستطيع البقاء سينجل ولو لمدة شهر واحد قبل زواجه، قائلًا: "قعدت عشرين سنة في حياتي، عمرها ما حصلت إني قعدت شهر سينجل، كنت بدخل من علاقة لعلاقة، لإني بخاف أبقى لوحدي وبحس إني لو مش في علاقة يبقى أنا ولا حاجة، وكنت بقول على البيت الفاضي إنه زى قبر، كنت ساعات بركن العربية وأقعد ساعة أسمع أغاني عشان مش قادر أدخل البيت ومفيش حد جوه".

واختتم عمرو سلامة كلامه، مشيرًا إلى الصورة التي يريد أن يتذكره بها الناس بعد وفاته، قائلًا:"شايف إن كلنا رايحين القبر وكده كده محدش بياخد حاجة معاه، وعايز الناس تفتكرني إني مكنتش مؤذي أبدًا، ياريت يفتكروا إني اديت كتير، والفكرة مش أنت هتاخد معاك ايه وأنت بتموت لكن الفكرة إنك هتبقى باصص لنفسك إزاي وأنت بتموت".