مخرج مسلسل سفاح الجيزة يرد على الانتقادات الموجهة لـ باسم سمرة وداليا شوقي.. فيديو

علق هادي الباجوري مخرج مسلسل سفاح الجيزة، على الانتقادات التي وُجهت للفنان باسم سمرة وداليا شوقي، وذلك خلال أدائهم في مسلسل سفاح الجيزة، الذي حقق نجاحًا كبيرًا منذ عرضه عبر منصة شاهد الرقمية.

رد هادي الباجوري على الإنتقادات الموجهه لباسم سمرة أثناء لقائه في برنامج تفاعلكم الذي تقدمه الإعلامية سارة دندراوي المذاع على قناة العربية قائلًا: " الجمهور بيحب يتفرج على اللي متعود عليه، ولما بتديله حاجة مختلفة بياخد فترة لحد ما يتعود، ليه باسم سمرة ميعملش ظابط؟، عشان متعود يعمل دور بلطجي ؟!.. ده مالوش دعوة بالموضوع، إحنا اتعودنا في مصر أن الظابط في المسلسلات بيكون ليه معاير وشكل معين زي أمير كرارة"

تصريحات هادي الباحوري

وأضاف هادي الباجوري قائلًا: " أنا بحب أخرج عن المألوف، باسم سمرة ممثل شاطر أوي، وفي البداية الناس اتخطفت من أدائه، وبعد فترة شافوه بيعمل الدور مظبوط وحلو، وأنا بشوف أنه ممثل شاطر أوي، وأي دور هيأخده هيعمله مظبوط".

تعليق هادي الباجوري على الانتقادات التى تعرضت لها داليا شوقي

كما أعرب هادي الباجوري عن استيائه من رد الفعل العنيف الذي تعرضت له داليا شوقي قائلًا: " الجمهور بقى ماسك الكورباج، يعني في أول 4 حلقات الناس كانت طايرة بداليا وشايلنها فوق دماغهم، ولما عملت المشهد ده وحسوا أنها بالغت فيه مسكولها الكورباج وسكاكين ودبحوها، مع أن لو انتي اكتشفتي أن جوزك اللي متجوزاه بقالك 4 سنين وقاتل 9 وغير كده أنه خطف أختك وبيحبها، ممكن رد فعلك يكون أي حاجة".

وأضاف هادي الباجوري قائلًا: " السوشيال ميديا عندنا بقيت مبالغة وقاعدين للناس على الواحدة، ولو داليا بالغت شوية في المشهد فأنا المسئول عن ده، وكان ممكن أقولها تهدي لكن أنا كنت مقتنع بأدائها، وشايف أنها ممثلة شاطرة أوي، ومش هطلع أقول الكلام ده على السوشيال ميديا، وأنا أسف إني هقول كده بس الناس بقيت تقول رأيها بشكل عنيف أوي".

ومن جانب آخر، تحدث هادي الباجوري عن تحضيراته مع الفنان أحمد فهمي لمسلسل سفاح الجيزة قائلًا: " أنا بحب أحضر كويس أوي في الأول مع الممثلين، وعملنا قراءة عادية وبروفة ترابيزة وكنا بنقترح تفاصيل معينة للمسلسل، ووقتها اتفقنا على تون الصوت والابتسامة والنظرة وحركة الجسم، والتفاصيل دي كلها بتطلع لما تقرأ مع الممثل وبتكون المفتاح للشخصية، وكانت ساعات بتفلت منه وقت التصوير وبنرجعه تاني".

وعن وجهة نظره في عدد حلقات مسلسل سفاح الجيزة وضح هادي الباجوري قائلًا: " أنا وجهة نظري أن الموضوع طول الوقت يكون فيه أحداث ومتلحقيش تتنفسي، مش كل حاجة بالملعقة أنا عايز الجمهور يفكر معايا شوية، احنا لو بنتكلم عن الراجل المستوحى من  القصة الحقيقة فهو بالفعل قتل 4 ولكن احنا خليناه في المسلسل خطف كمان، وهى دي الدراما اللي بنزودها، ولو كانوا أكتر من 8 حلقات بالنسبالي هيكون في ملل في العمل".