كيف تعامل هشام سليم مع أزمة تحول ابنته جنسيًا لذكر؟

واجه الفنان الراحل هشام سليم العديد من الأزمات بشجاعة كبيرة، وأهمها أزمة تحول ابنته "نور" إلى ذكر.

تحدث هشام سليم في تصريحات تلفزيونية سابقة قائلًا: "من يوم ولادته وأنا عارف أن نور يمتلك جسد شاب، ومتفاجئتش لما قالي وهو عنده 18 سنة أنه عايز يعمل عملية التحول الجنسي، وده لأنه كان بيعاني من خلل هرموني".

أزمة التحول الجنسي لنجل هشام سليم

وأضاف هشام سليم قائلًا: "إحنا في مصر بنعترف بالذكر والأنثى بس، معندناش أي فكرة عن مرحلة التحول الجنسي، وأنا مينفعش أكلم المجتمع عشان يتقبل الموضوع لأنه مش سهل، ومحدش ليه حق أنه يحاسب ابني أو يحاسبني، ربنا اللي خلقنا هو اللي يحاسبنا".

مواجهة نجل هشام سليم للمجتمع

قرر نور هشام سليم مواجهة المجتمع، حيث ظهر إلى جانب والده في برنامج "جعفر توك".

كما تحدث نور هشام سليم قائلًا: "لو مكنتش عملت كده كنت انتحرت، أنا لقيت دعم كبير من والدي لما قولتله أنا عايز أعمل إيه، وقتها مكنتش شايف ليا مستقبل ولا شغل ولا جواز ولا أي حاجة".

وأضاف نور هشام سليم قائلًا: "أنا لسه بتقبل نفسي، أنا كنت نورا البنت بتصرفات ولاد، من ساعة ما اتولدت وأنا حاسس بحاجة غلط، المرحلة الصعبة عدت وأنا كويس دلوقتي، وأنا مش عايز أغير نظرة حد ليا، أنا بحترم كل الناس وأتمنى الناس تحترمني".

وتابع نور هشام سليم قائلًا: "أنا محظوظ جدًا أن والدي هشام سليم، وأنه بيساعدني وأهلي كلهم بيدعموني، أنا بني آدم ولو حد شايف أني غلطت يجي ويتكلم معايا".

دفاع هشام سليم عن نجله

علق هشام سليم بعد الهجوم الذي تعرض له " نور" على السوشيال ميديا أثناء لقائه في برنامج Et بالعربي قائلًا: "نور شجاع أنه بيحاول يفهم الناس الحقيقة، وبالنسبة للناس اللي بتقول أنه ميعرفش ربنا وربنا يحرقه، نور مأذاش حد وكل اللي بيدور عليه الرحمة، ارحموه عشان يعرف يعيش".

وفاة هشام سليم

يذكر أن هشام سليم توفي بعد صراع طويل مع مرض سرطان الرئة، والذي تم اكتشافه بعد مرحلة متأخرة مما أدى لتدهور حالته الصحية بسرعة كبيرة، حتى انتصر عليه المرض يوم 22 سبتمبر.