إلهام شاهين: "كنت ناوية اعتزل بعد ما أقدم 100 فيلم ولهذا السبب تراجعت"

كشفت الفنانة إلهام شاهين عن نيتها في قرار الاعتزال الذي اتخذته من قبل، مؤكدا أنها كانت تنوي الاعتزال بعد أن تشارك في 100 فيلم سينمائي، ولكنها تراجعت عنه بعد ذلك.

وتحدثت إلهام شاهين أثناء ندوة تكريمها في مهرجان الإسكندرية قائلة: "أنا عملت 101 فيلم، والفيلم رقم 100 بالنسبالي كان فيلم يوم للستات، وأنا صغيرة كان نفسي أعمل 100 فيلم زي ما بيقولوا في أعياد الميلاد عقبال 100 سنة كدا، وبعد الفيلم رقم 100 قولت أبطل بقى.. عملت كل الأنماط والشخصيات، وعملت أفلام تقيلة وملفتة للنظر، ووقتها قلت المفروض أبطل من غير ما أقول أني اعتزلت عشان مش عايزة أكرر حاجة، بس أنا مجنونة بالفن".

تصريحات إلهام شاهين

وأضافت إلهام شاهين قائلة: "أنا عملت في التلفزيون حوالي 50 سنة، وقولت كل ما الاقي دور معملتهوش هعمله، التليفزيون بيبقى فالأغلب فيه ملل وتطويل، بس لقيت جديد في حكاية ألفريدو، والسنة اللي فاتت لقيت دور زعيمة داعش، وكاملة أبو ذكرى قالتلي فيه دور محدش يعمله غيرك، وقتها قولت إزاي هعمله ده أنا صاحبة أدوار مضادة لكل التيارات المتطرفة".

وتابعت إلهام شاهين قائلة: " اتهاجمت أوي وبقيت مستغربة أني بمثلهم، وبقيت بقول هما بيعملوا إيه ومضايقين ليه؟!.. لكن هما أصلًا أبعد ما يكونوا عن الدين والإسلام، اشتغلت مع أساتذة في بدايتي، أنا سعيدة جدًا بتاريخي الكبير والطويل".