إلهام شاهين: القدر أنقذني من الإخوان وكنت هموت على إيد نور الشريف
كشفت الفنانة إلهام شاهين عن كواليس عملها مع الفنان الراحل نور الشريف، موضحة أنها تعرضت أكثر من مرة لحوادث عديدة وللموت، مشيرة أن مهنة التمثيل صعبة.
تحدثت إلهام شاهين أثناء ندوتها في فعاليات مهرجان الإسكندرية السينمائي قائلة: "في مسرحية كاليجولا كنت هموت على إيد نور الشريف، مهنتنا صعبة جدًا، أنا اتعرضت للغرق والحرق واتقلبت بيا عربيات واتعرضت للموت أكثر من مرة في أعمالي".
تصريحات إلهام شاهين
أضافت إلهام شاهين قائلة: "شعري اتحرق بجد وقت مشهد الحرق، ومفيش علينا تأمين ولا حاجة، كنت بصور فيلم مع نور الشريف وحطوا جاز بالغلط على الطرحة اللي كانت على شعري، ولما بدأنا التصوير لقيت فجأة النار مسكت في شعري، وواحد من الناس اللي كانوا مفروض يدخلوا الأوضة في المشهد شد الطرحة والضافير اللي كانت متركبة عشان يلحقني، ويا عيني النار مسكت فيه هو".
وتابعت إلهام شاهين قائلة: "كان موجود معانا في المشهد بتاع مطافي، ولما سألوه ليه مطفتهاش قالهم بلغوني إني أدخل لو حصل حاجة للديكور عشان كنا بنصور في مبنى التلفزيون، يعني لو لبست النار في فنانة عادي لكن لو في ستارة هتدخل.. حلقت شعري وفضلت بلبس باروكات لمدة سنة".
ومن جانب آخر، أشارت إلهام شاهين إلى أن القدر أنقذها من الأخوان قائلة: "كنت يوم رايحة الكنيسة لكن العربية اتعطلت بالرغم أنها كانت جديدة، والطريق كان طويل للكنيسة ووصلت متأخر، ولما وصلت وجيت اعتذر قالولي الحمد لله أنك اتأخرتي، كانوا فكرين أني اتأخرت قاصدة بسبب اللي حصل".
وتابعت إلهام شاهين: " اكتشفت أن الإخوان كانوا عاملين مظاهرة قدام الكنيسة ضد إلهام شاهين، ولما اتقبص عليهم كنت أنا وصلت، فالقدر أنقذني".
