حسن شاكوش: "لو بطلت شغل فيه 50 بيت مش هيلاقوا أكل ووقفت شغلي شهرين"
كشف مؤدي المهرجانات الشعبية حسن شاكوش، عن تفاصيل أعماله الجديدة التي يستعد لها في الفترة المقبلة، وذلك بعد توقفه بضعة أشهر تضامنًا مع أهالي غزة.
قال حسن شاكوش خلال بث مباشر عبر حسابه على انستجرام: “ورايا التزامات، ومعايا أخواتي وأهلي حوالي 5 أو 6 بيوت وفرقتي حوالي 40 فرد واللي شغالين معايا حوالي 7 أشخاص، ولو أنا قعدت في البيت الـ 50 أو 60 بيت دول مش هيلاقوا يأكلوا ومتعلقين بيا بعد ربنا”.
أما عن غنائه للمهرجانات، تابع حسن شاكوش: “أنا مميز في الحتة ديه ولما بغني بحب أكون متفاعل مع الجمهور بتاعي وفيه ناس من الجمهور بيحبوا رقصي، والواحد مش بيلبس بدلة رقص ويطلع يغني وربنا يخليلنا الناس اللي في ضهرنا ويحبونا واللي بيكرهنا بيقولنا ربنا يهديكم ويصلح حالكم لأننا وصلنا لمرحلة إن 95% مننا أننا بنكره الخير لأي حد ناجح حتى لو راجل بتاع ورنيش هنلاقي ليه أعداء”.
حسن شاكوش: في الشغلانة بتاعتنا اللي ينام شهر ميبقاش موجود
وعن دعمه لأحداث فلسطين وتأجيله بعض الحفلات، أكد شاكوش: “أنا كنت موقف شغلي شهرين أو 3 شهور عشان أخواتنا في فلسطين والواحد لو في أيده يعمل أي حاجة كنا هنعمل مش هنتأخر ووقفنا شغلنا بس الشغلانة بتاعتنا ديه اللي ينام فيها شهر وميبقاش موجود بيبقى صعب، والشغلانة دي مش عايزة النوم عايز 24 ساعة تفكر وتعمل”.
وأضاف شاكوش: “لو قعدت في البيت مش هلاقي أكل وأنتوا عارفين الدنيا عاملة ازاي والغلا الله يكون في عون الناس، محدش قالي أوقف شغل، لكن ذوقيًا مني مينفعش أشوف اخواتي بيموتوا في فلسطين وبقالي 3 شهور مشتغلش بسبب أخواتنا في فلسطين، ولو هتلاحظوا المواعيد اللي كنت ملتزم بيها والحفلات ومنزلتش منهم ستوري من حفلة على انستجرام ومبنزلش حتى الدعاية بتاعت الأماكن”.
واختتم شاكوش حديثه، قائلًا: “الفترة الجاية فيه شغل إن شاء الله كتير في إسكندرية، إسكندرية ديه مش بلد ده شعب، وعندي كذا حفلة في أوروبا في فرنسا وهولندا ولندن لسه التواريخ ما اتحطتش وعندي في أمريكا”.
اقرأ أيضًا: دفعت 8 ملايين دولار.. التفاصيل الكاملة لاتفاق لانقاذ شاكيرا من دخول السجن في إسبانيا
