مها أحمد: لو بتاجر بابني كان زماني في كل بلد شوية

كشفت الفنانة مها أحمد عن تفاصيل الأزمة الصحية التي تعرض لها نجلها أحمد، موضحة أن السبب في مرضه هو الخطأ الطبي، وأن ذوي الاحتياجات يحتاجون لعناية خاصة.

تصريحات مها أحمد عن نجلها

وتحدثت مها أحمد في تصريحات تليفزيونية، قائلة: أحمد ابني من ذوي الهمم، والسبب في اللي حصله كان دكتور عمل خطأ طبي، ومقاضيتش الدكتور لأنه مش هيرجعلي مخ ابني لأنه نقص أكسجين.

وتابعت فيما يخص أسباب مرضه، قائلة: السبب وأنا بولد أن الدكتور شده بالشفاط، وبعدها خرجني ولدت قيصري، ولو كنت قلت ساعتها عمرهم ما هيقولوا الحقيقة اللي حصلت جوه أوضة العمليات، وهو بالنسبالي الحياة، وممكن ربنا يكون عمل كده عشان أدخل الجنة أنا وجوزي من غير ما نتعب في الدنيا.

واضافت مها أحمد: ابني لحد دلوقتي تعبه متعة وراحة بالنسبالي، أنا مش بعيط عشان أحمد كده، ولكن أحمد مالوش ذنب في كده، أنا لما كان ابني بيرجّع كنت بدوق الترجيع، عشان طريقة الدوا كده فبدوق عشان أعرف ده الدوا ولا لأ لأن دي سموم.

مها أحمد: عمري ما طلبت من النقابة فلوس عشان ابني

واكملت: وأنا نازلة لازم احكيله ولو ضحك بعرف أن كده الموضوع اللي هعمله هيمشي، وأنا أي مكان بروحه باخده معايا ومجدي جوزي بيروح يشوف مكان مناسب عشان يبقى ينام فيه.

وواصلت مها: اللي الناس متعرفوش إني كل سنة بدخل بيه المستشفى عشان عنده نقص حديد، ومحدش يعرف حاجة غير أهلي، وعمري ما طلبت لا من النقابة ولا أي حد فلوس، ولا سعيت أني اجيبله معاش زي ما الرئيس السيسي عامل للأطفال ذوي الهمم، ولو بتاجر بابني كان زماني في كل بلد شوية.

وانهت مها أحمد حوارها، قائلة: هفضل أشتغل على تيك توك، ولو جالي شغل في منصة هشتغل، وأنا دخلت الجنة وأنا في الدنيا، مش بعيط عشان اللي حصل لابني ولا أنه معيوب، لو من عند ربنا عادي لكن لما يبقى خطأ طبي ده اللي بيزعل، وأنا في الجنة هسمع منه ياماما وهجوزه في الجنة وربنا وعدنا بكده، ولكل أم ابنها كدة اصبري هتشوفي هيبقى إزاي في الجنة.

اقرأ أيضًا: بطولة طفلة وطابع أوروبي.. معلومات عن فيلم The Goat قبل عرضه في مهرجان الجونة