ابتعاد الفيشاوي عن المخدرات وعودة تامر حسني وبسمة.. تصريحات أثارت جدل في رمضان 2024

رضوى عواد

الثلاثاء 26/مارس/2024 - 05:08 م

أثار العديد من الفنانين الجدل من خلال تصريحاتهم في برامج تليفزيونية يتم عرضها طوال شهر رمضان المبارك 2024، منهم من تعرض للسحر والحسد، ومنهم أعلنت عودتها لزوجها بعد فترة طويلة من الانفصال بينهما.

تصريحات النجوم في رمضان 2024

تصريحات مي عمر

قالت الفنانة مي عمر خلال لقاءها في برنامج "أسرار" إن هناك فنانة تدفع أموال لكى يهاجمها الناس، مضيفة: "فنانة بتدفع فلوس عشان تخلي الناس تهاجمني وناس من اللي قبضوا قالوا لي إنها دفعتلهم، الحاجات دي بتبقى معروفة".

تصريحات ياسمين صبري

وصفت الفنانة ياسمين صبري نفسها بأنها حالة نادرة، وقالت: "أنا كياني يضيف لأى راجل أكون زوجة له، كل شيء اشتغلت عليه وبنيته، السمعة والأسلوب والطريقة، وعدم وجود أخطاء، كلها أشياء تضيف له، أنا ست متحفظة في ملابسي وطريقتي وأسلوبي وأفلامي وتمثيلي وظهوري وكل شيء، والرجل الشرقي يعشق حاجة زي دي وهي حاجة نادرة"، وذلك خلال لقاءها في بودكاست “بيج تايم”.

تصريحات حورية فرغلي

كما كشفت الفنانة حورية فرغلي، عن رفضها مليوني جنيه كمهر زواج وقالت: “واحد لبناني مليونير، عرض 2 مليون دولار علشان يتجوزني، راجل أحلى مني، مش عارفة هو راجل ولا بنت، ومش فاهمة من صوره هل بيحب الرجالة والستات ولا إيه”.

تصريحات بسمة بوسيل

وكشفت المطربة بسمة بوسيل عن سبب دفاعها عن الفنان سعد لمجرد في قضية التحرش، قائلة: "أنا ماشية بقلبي ووقفت مع ابن بلدي، وقضية سعد لمجرد فيها حاجات كثيرة غير مفهومة، لما يبقى عليه حكم نهائي أكيد مش هسانده"، وعن عودتها لتامر حسني، قالت: "حلم رجوعي لتامر حسني هيتحقق".

تصريحات انتصار

أما الفنانة انتصار أثارت الجدل حول خلافها مع المخرجة كاملة أبو ذكري، وقالت: "عاوزاها تبطل تتكلم عني في البرامج، أصل أنا بتأخر في التصوير ومش هتشعل معايا تاني، خلاص متشتغليش، محدش ضربك على إيدك وقالك اشتغلي معايا بالعافية، أنا مش منضبطة ومش مستريحة معايا في شغلي بلاش تشتغلي معايا".

تصريحات منى زكي

أما الفنانة منى زكي فكان لها أكثر من تصريح في برنامج "بيج تايم" منها: “أنا وأحمد حلمي كل ما نشوف بعض لو خارجين ورجعنا بنبوس بعض علشان نعلم ولادنا يعملوا كده، وأحمد والله العظيم ساعات أشوفه تحصل عندي ضربات قلب”.

تصريحات أحمد سعد

وتصدر الفنان أحمد سعد التريند بسبب تصريحاته عن شقيقه دكتور سامح سعد الأستاذ والباحث في الفيزياء الحيوية، وقال: “أخويا سامح عالم وهو دا الوحيد اللي ضاع فينا، ما هو لو كان طلع فنان كان زمانه كسب أكتر بكتير، وهو دلوقتي لسه عنده عربية 128”.

وكان له تصريح آخر عن ارتداء الحلق، وقال: "أنا خرمت ودني ولبست حلق في وقت كانت الدنيا كلها مخرومة، طبعًا اللي عملته كان غلط واعتذرت عنه، ولو البنات أحيانا بتعمل أشياء غريبة أنا عملت زى البنات".

تصريحات سمية الخشاب

وهاجمت الفنانة سمية الخشاب الفنان رامز جلال بعد عرض حلقتها في برنامج "رامز جاب من الآخر" وقالت: "مينفعش برامج المقالب دي تكون متاحة ومبررة لكن ليه ناس كتير تتعرض للأذى مفيش أي مبرر أن لمجرد أنه يطلع ويشتهر ويعمل مشاهدات على حساب صحة الناس، الصحة كنز ومفيش أغلى منها".

تصريحات كريم عبد العزيز

كما حل الفنان كريم عبد العزيز ضيف في برنامج بودكاست "بيج تايم" وقال العديد من التصريحات منها: "وجهة نظري إن سر المرأة في أظافر يديها ورجليها، أنا تفرق عندي التفاصيل دي قوي، وهي أول حاجة تلفت نظري".

وعن علاقته بالملابس، قال كريم عبد العزيز: "عندي صفة لو في هدوم حبيتها أشتري منها 40، والناس تفتكر إنها مش بتتغير، أنا مجنون باللون الأسود، لون بيلم وستار".

تصريحات لقاء الخميسي

وأثارت الفنانة لقاء الخميسي الجدل بتصريحاتها، منها: "أنا مسلمة وأبويا مسلم لكن أمي مسيحية، وكل واحد بداخله ربنا، أما طريقة اعتناقه لديانته فهي شيء يخصه وحده ولا يخص الآخرين، روحت الكنيسة مع أمي مرات عديدة وصليت وهي نفس الصلاة، الطقس فقط يختلف، لكن هنا أو هنا ندعي ربنا ونكلمه".

تصريحات حلا شيحة

وقالت حلا شيحة: “لما اخترت زوجي كنت بحبه وأنا طفلة صغيرة، واشتد حبي له لشعوري أنه قريب من ربنا، وفيه ناس قالت أصل كل ما تتجوزي بتختاري حد متدين وتتحجبي لما تتجوزيه، وهو كان حب عمري ودايمًا بيلفت نظري الرجالة المتدينة”.

تصريحات ناهد السباعي

وظهرت ناهد السباعي في برنامج "حبر سري" وتحدثت عن رأيها في المثلية الجنسية، قائلة: "لا أشجع المثلية الجنيسة، ما أعرفه من الدين إن ربنا قال لنا في قوم لوط ومذكورين وبني آدمين، لكن أرفض تقديم فيلم يعبر عنهم"، وتطرقت بالحديث عن الفنان الراحل هيثم أحمد زكي، وقالت: “هو مكنش لوحده آخر أيامه والكلام ده مش صحيح هو كان خاطب، وعملنا مسجد باسمه بعد ما توفى”.

تصريحات نجوى فؤاد

وتحدثت نجوى فؤاد خلال لقاءها في برنامج “حبر سري” عن الفنانة يسرا وقالت: "لن أقبل مساعدة مالية من يسرا رغم الملايين التي صرفتها عليها، في الوقت الحالي مش هقبل مساعدة منها، لإني هتعب إنسانيا ونفسيا، أنا عايزة أحتاج لربنا مش لبشر"، وتابعت: “محدش بيسأل عليا من الفنانين ولا حتى النقيب بتاعنا، ولا سأل عليا من 6 شهور، وسألته على المعاش قالي” "أعتقد 600 جنيه، ملقتش رد أرد عليه".

تصريحات خالد يوسف

وتحدث المخرج خالد يوسف عن الفنانة حنان ترك وقال: “حنان كان في بيني وبينها مناقشات كتير في قضية الفن، وقالت كلام لم أقتنع به، وهي حالة ميئوس منها، وبقولها إزاى تعتزلي؟”.

تصريحات مها أحمد

وتحدثت الفنانة مها أحمد في برنامج "أسرار" مع أميرة بدر عن خلافها مع الفنان فادي خفاجة وقالت: "فادي خفاجة حاسدني، حقي هاخده بالقانون، رفعت عليه 4 قضايا، ومنها سب وقذف، وانتهاك خصوصية، وتحرش على مستوى السوشيال ميديا".

تصريحات شيرين رضا

كشفت الفنانة شيرين رضا عن سبب انفصالها عن عمرو دياب وقالت: "أنا لا أغير لأن الغيرة لا توجع إلا صاحبها، وأنا إتجوزت واحد مشهور ولازم يكون عنده معجبين، هو هيفضل حواليه نسوان طول عمره، وأنا بسميهم نسوان مهما كان سنهم، لإن اللي تجري ورا راجل بالأسلوب ده تبقى نسوان مش ستات محترمين".

تصريحات فيفي عبده

وكان للفنانة فيفي عبده تصريح عن الموت، وقالت خلال لقاءها في برنامج “حبر سري”: "قلت لولادي لما أموت سيبوني يومين قبل الدفن علشان تتأكدوا إني ميتة فعلا".

وعن الزواج العرفي، قالت: "بعترف بالجواز العرفي لأني مخليش الراجل يلمسني إلا لما يتجوزني وأعتبرها فترة خطوبة، وبعدين أكتب كتاب رسمي، وكل اللي اتجوزتهم محترمين وحظي كان كويس".

تصريحات شيرين عبد الوهاب

وتحدثت الفنانة شيرين عبد الوهاب في بودكاست "بيج تايم" عن السحر، وقالت: "لقيت صرة معلقة على باب البيت، وفتحتها لقيت فيها بودرة من المقابر ومفتاح غرفة نومي، وده عمل والمفتاح ده المفروض يقفل كل حاجة في حياتك".

تصريحات أحمد الفيشاوي

حل الفنان أحمد الفيشاوي ضيف في برنامج "ع المسرح" وكان له العديد من التصريحات منها: "مقدرش أصنف نفسي صوفي دي حاجة في علم ربنا، أنا كنت إخوان مسلمين لمدة سنتين، وكانت خبرة واتعلمت حاجات جديدة، وساعات ممكن أتعلم من أصحابي المسيحيين".

وتابع أحمد الفيشاوي: "عندي نفس الدكتور من سنة 1997 بيعالجني علاج نفسي، وفي دكتور ثاني روحت له وثاني يوم مات، تقريبا حكيت له زيادة ومقدرش يكمل، وبقالي 7 سنين تقريبا بهرب من الشرب وأى نوع من المخدرات، ومستوعب إني عندي 43 سنة ومش بصغر، ولازم أهتم بنفسي وأركز في شغلي أكتر".

تصريحات بوسي

تحدثت الفنانة بوسي عن زوجها الأول خلال لقاءها في برنامج “العرافة”، وقالت: "جوزي الأولاني كان مشغلني في شارع الهرم وبينحت باسمي، والمفروض إني غير أجري وأجر فرقتي أحصل على نسبة من الفلوس اللي بتترمي علينا، لكن كنت باخد 400 جنيه في النمرة، وهو الباقي، أقل واحد في الصالة كان ممكن يرمي 5 آلاف جنيه، يعني بترمي علينا 100 و200 ألف جنيه، شوفي نسبتي تطلع كام؟".