كاتب يتهم صناع مسلسل خالد نور وولده نور خالد بسرقة فكرته.. تفاصيل
كشف الكاتب حاتم حسين عن سرقة صناع مسلسل “خالد نور وولده نور خالد” فكرة العمل منه، مشيرًا إلى أنه عرضها على أكثر من فنان قبل ذلك.
كتب الكاتب حاتم حسين عبر حسابه على فيسبوك: “طيب يا جماعة مسلسل خالد نور وولده نور خالد فكرته الأساسية أب وابنه في نفس السن بيخوضوا رحلة مسروقة من مسلسل كنت عامله وبعدها اتحول لفيلم المسلسل كفكرة طلع لأحمد أمين وأكرم حسني وبعت لأمين المعالجة ببريزنتيشن أحمد أمين بكل إحترام قاللي رأيه وتخوفاته من الفكرة وممكن أمين يشهد على ده، بعدها للأستاذ طارق الجنايني عجبته الفكرة وشاف نحولها لفيلم وفعلًا اشتغلت على معالجة الفكرة وتحويلها لفيلم بعدها طارق الجنايني انشغل والموضوع نام وفيه إيميلات بالمعالجة مبعوتة”.
سرقة فكرة مسلسل خالد نور وولده نور خالد
وتابع: “المهم الفكرة فضلت موجودة لحد ما بدأت اشتغلها مع نجم كبير مش هاقول اسمه وفي وسط الشغل فوجئت ببوستر المسلسل من الإسم شكيت كلمت شريكي في الكتابة أحمد رشدي عرفت إنه عرض الفكرة على نجم كوميدي برضو مش هقول اسمه فعجبته جدًا وتحمسلها وشاف إن أنسب واحد يعملها معاه هو كريم محمود عبد العزيز وفعلًا قابل كريم وقاله الفكرة كريم انبهر بالفكرة لكن ما اظهرش أى اهتمام على حسب رواية النجم اللي بثق في كلامه جدًا.. كل ده كنت مش متأكد إنها نفس الفكرة كلمت مؤلف المسلسل صديقي قلتله عايز اسألك سؤال هل المسلسل بتاعك قصته إن هيكون أب وابنه في نفس السن بيعملوا رحلة ما (buddy comedy) odd couple”
وأضاف: “قالي اه سألته انت اللي جايب الفكرة ولا نجم أو منتج قالولك احنا معانا فكرة logline عايزين نشتغل عليه، قالي لا أنا اللي جايبها أنا واللي بيكتب معايا فأنا صدقته.. بس بعد كده هو قال للنجم ده إن شيكو هو اللي جاب الفكرة وده عكس اللي قالهولي وأنا عذراه لإنه ممكن يبقى مش عايز يلبس حد بس هى دي الحكاية هتقولولي مسجل هاقولكو اه الفكرة بس إن اللي بيحصل إنك بتحور الفكرة وتخلق مبررات تانية وشخصيات تانية بس بتبقى حرقت أكتر عنصر جذاب في الحكاية أب وابنه في نفس السن بيخوضوا رحلة بين الماضي والحاضر”.
تفاصيل مسلسل خالد نور وولده نور خالد
وأكمل حديثه قائلًا: “وفي الآخر هتبقى مش نفس الفكرة ويتقال أصلها اتعملت ميت مرة في أفلام كذا وكذا وتوارد خواطر وكل الكلام الجميل ده، عامل البوست ده عشان لازم يبقى فيه طريقة تحفظ الحقوق والافكار من سرقة الممثلين والمنتجين اللي بيعتبروا الفكرة يعني حاجة بسيطة، وعشان احنا كمؤلفين بنبيع أفكار وبعدين نكتبها لما نتفق عليها مش كل ما هتجيلي فكرة هكتبها فيلم ولا مسلسل قبل ما اعرضها على حد، وتاني اللي بيسرق بيسرق سطر واحد ويعمله بطريقته وبيعتبر ده صياعة”.
واختتم قائلًا: “أكيد متضايق شوية لإن الفكرة دي كنت بحبها جدًا وكنت محضرلها حاجات حلوة وكنت هاعملها مع كوميديان كبير بحبه وبقالنا كتير عايزين نشتغل مع بعض ومتضايق لإنها مش أول مرة تحصل معايا، وملحوظة أنا مستعد لأى مواجهة مع أى حد من صناع العمل وتعديل الفكرة موجودة عندي من شهر 8 عام 2021”.
اقرأ أيضًا: بسمة بوسيل: "مبقدرش أغفر الخيانة وهرفض إن بنتي ترتبط بشخص مشهور"
