منى زكي: «بعتذر لبنتي على سخافتي في تربيتها وضغوط المهنة قصرت على علاقتي بأحمد»
حلت الفنانة منى زكي، ضيفة في أولى حلقات برنامج «كلام نواعم» الموسم الجديد، المذاع على قناة mbc، والذي تحدثت فيه عن تجربتها مع الأمومة ومعنى مصطلح التربية الإيجابية، وتفاصيل حياتها الشخصية وعلاقتها بزوجها الفنان أحمد حلمي.
أبرز تصريحات منى زكي
وجاءت أبرز تصريحات منى زكي خلال الحلقة:
-بعتذر لبنتي على سخافتي معاها لأنها كانت أول بنت ليا.
-كنت صغيرة وفاهمة إن الصح صح، ولازم يبقى فيه عقاب ونظام.
-دائمًا بعتذر لبنتي على سخافتي دي، لأني لسه متعلمة من قريب.
-ماسمهاش عقاب اسمها عواقب، لازم نفكرهم دايمًا إيه هيحصل لو عمل دا.
-كلنا أعصابنا بتفلت لكن باجي وبعتذر في الآخر.
-التربية الإيجابية مصطلح ناس كتير فاهماه غلط.
-مش معنى تربية إيجابية أن الولد يتعدى حدوده ويبقى راسه براس أهله.
-الإيجابية أننا ندلهم على الثقة في نفسهم ونكبر المميزات اللي عنده مش إننا ندلعه.
-المهم أن الأم تكون صديقة ليهم، عشان لو حصل حاجه يقدروا يحكوها.
-الضغوطات المهنية قصرت كتير على علاقتي بأحمد، لأنها مهنة صعبة.
-علشان العلاقة بين الزوجين تنجح لازم يكون الاتنين بيحاولوا ينجحوها مع بعض.
-في بداية جوازنا كانت فكرة صعبة على أحمد أنه يقعد مع العيال.
-فهمته أن علاقته ببنته أهم وممكن تتأثر.
-الأضواء مغرية ونجاحات المهنة قوية، ولو الشخص مش عاقل وواقعي ممكن يتجنن.
-إحباطات العمل صعبة جدًا، ومتعبة نفسيا أكتر.
-لما بيجيلي اكتئاب بعد فشل حاجه مهمة، الطرف التاني بيكون موجود علشان يساعدك.
-بس لازم مأفورش في الموضوع ونعرف أن أهم حاجة العيلة.
-لو الشغل كله راح مني فأنا عندي حاجة أقوى وأحلى وهي عيلتي.
-بشوف أن ربنا إداني الموهبة مش بس علشان أبقى مشهورة، لكن علشان أفيد الناس.
-لو حد شايفني بفكر صح ممكن لما يلاقيني بعمل توعية لحاجة ده يشجعه.
-سعيدة بنجاح المسلسل وشايفة أن تحرك مجلس النواب خطوة إيجابية.
-كنت عارفة أننا بنعمل قضية مهمة لكن خروج المسلسل بالشكل دا فاجئني.
-فكرة المسلسل إن حنان تعمل راجل علشان تقدر تواجه، لكن المخرج شاف أنها قوية كفاية وتقدر تواجه وهي ست.
منى زكي فى مهرجان الدراما
وحصلت الفنانة منى زكي على جائزة أفضل ممثلة، في مهرجان القاهرة للدراما الذي أقيم في مدينة العلمين، حيث حصلت على الجائزة بتصويت من الجمهور عن مسلسلها «تحت الوصاية»، الذي شارك في السباق الرمضاني الماضي 2023.
