إسماعيل فرغلي يكشف تفاصيل إصابته بورم في الأحبال الصوتية
كشف الفنان إسماعيل فرغلي عن تفاصيل مرضه الفترة الماضية وإصابته بورم في الأحبال الصوتية، ذلك أثناء تصويره مسلسل مكتوب عليا.
صرح إسماعيل فرغلي بإصابته بورم في الأحبال الصوتية، وذلك أثناء لقائه في برنامج على قناة المحور قائلًا: "أنا جالي ورم في زوري والحمد لله ربنا نجاني منه، كان في أحبالي الصوتية ووقتها كنت بصور مسلسل مكتوب عليا، روحت لصاحبي دكتور قالي أنت كويس بس في حباية صغيرة طالعة، وقالي لازم اشوف الغدة، عملت إشاعة على الغدة وقالولي في ورم ولازم اشيله".
تصريحات إسماعيل فرغلي
وأضاف إسماعيل فرغلي: "قولتلهم أنا بصور مسلسل، قالولي حياتك ولا المسلسل، ربنا كرمني الحمد لله بدكتور محترم قالي خلص المسلسل وعيد وبعدها نعملها، ولما دخلت المستشفى قلت لمراتي مفيش مخلوق يقولي سلامتك، ولا حد يكلمني سبيني مع اللي خلقني، قالولي الورم كبير على الأحبال الصوتية فلو مفيش دكتور كويس الأحبال الصوتية ممكن تتشال".
كما تابع إسماعيل فرغلي "لما فوقت من العملية كنت خايف أتكلم ما ألاقيش صوتي، فقلت الحمد لله وأنا معرفش صوتي راح ولا إيه، لحد بعد العملية بأسبوع بنشوفه طلع ورم حميد الحمد لله، كنت بصلي وأنا مكسوف وبقول لربنا كفاية اللي عملته معايا".
ومن جانب آخر، تحدث إسماعيل فرغلي عن علاقته بزوجته قائلًا: "بقالي مع مراتي 26 سنة، مش لاقي حاجة أقولها، كتر خيرها وبقول للناس تدعيلها ربنا يشفيها، لأنها الرزق اللي بجد".
ووضح إسماعيل فرغلي: "أنا يمكن ربنا ما ادانيش فلوس بس إداني اللي أحسن من الفلوس، لأن ممكن يكون معاك مليارات ومتعرفش تعيش، أنا بجنيه بألف أو حتى لو مفيش بعيش برضه، وهي ولا مرة طلبت الطلاق، قالتلي بس مرة كلمة وجعتني أوي، قالتلي أنا قلبي وجعني من قلة الفلوس".
كما أنه صرح بأنه زاد أجره بعد مسلسل “مكتوب عليا” وأن الشركة مسئولة عن 22 ممثلا وهو واحد منهم، والشركة هي المسئولة عن العقد واتفاقية الأجر ولها نسبتها 10%.
مسلسل مكتوب عليا
عرض مسلسل مكتوب عليا في موسم رمضان2022، وتدور أحداث المسلسل في إطار كوميدي حول تغير حياة جلال من خلال مقابلة غريبة، فعندما يستيقظ في اليوم التالي يجد كل ما سيحدث له خلال اليوم مكتوبا على جسده، فتتحول أيامه إلى سلسلة من المواقف الكوميدية.
شارك في مسلسل مكتوب عليا الكثير من الفنانين المميزين ومنهم "أكرم حسني، أيتن عامر، هنادي مهنا، عمرو عبد الجليل، إسماعيل فرغلي، حنان سليمان، أحمد فهمي" وغيرهم الكثير من الفنانين، والمسلسل من تأليف إيهاب بليبل وإخراج خالد الحلفاوي.
