نيللي كريم: الدراما تعبتني ومش ماضية عقود احتكار مع حد

كشفت الفنانة نيللي كريم عن تفاصيل مشاركتها في موسم رمضان 2024، مؤكدها أن ستغير مسارها الدرامي خلال الفترة القادمة، إلى جانب حديثها عن حقيقة خلافها مع شركة العدل جروب والفنان محمد رمضان وذلك بعد مشاركتها في فيلم ع الزيرو.

كشفت نيللي كريم أثناء لقائها في برنامج الراديو بيضحك الذى تقدمه الإعلامية فاطمة مصطفى المذاع علىى راديو 9090 عن مشاركتها في موسم رمضان القادم قائلة: "أنا بقالى فترة عايزة أريح الحقيقة لأني تعبت، ولإن كل رمضان بشتغل بعقد 4 شهور، بس السنة دي يمكن الدور كورق أقل من المسلسلات اللى فاتت، يعنى مثلًا فاتن أمل حربي كان من الجلدة للجلدة، فأيام الراحة اللي أخدتها كانت قليلة جدًا".

تصريحات نيللي كريم

وأضافت نيللي كريم قائلة: "السنة دي إن شاء الله هعمل حاجة مختلفة هيكون المسلسل كوميدي، أنا بحب أفرح الناس، الحقيقة أنا تعبت من الدراما التقيلة تعبتني نفسيًا، زهقت خلاص وعايزة أدخل مرحلة مختلفة".

وأشارت نيللي إلى أنها ستركز الفترة القادمة على السينما قائلة: "عايزة أركز في السينما لإن أنا مقصرة في السينما وبقالي كتير مش بقدم حاجة، السينما وحشتني، وليها طعم مختلف عن الدراما".

نيللي كريم عن خلافها مع شركة العدل جروب ومحمد رمضان

كما أكدت نيللي كريم قائلة: "أنا مش ماضية عقود احتكار مع أي حد ولا لشركة العدل جروب، وبشتغل مع ناس كتير قوي وأي حد بيشتغل معايا، لكن المهم هعمل إيه، وإيه المختلف اللي هقدمه".

وأضافت قائلة: " أنا معنديش خلافات مع محمد رمضان هو فنان محبوب ومجتهد، وبعتبر نفسي طلعت ضيفة شرف في فيلم ع الزيرو  الآن البطولة كانت بين محمد رمضان والطفل".

وتابعت نيللي كريم قائلة: "أنا مش من الناس اللي السوشيال ميديا عندها هدف، السوشيال ميديا ليها تأثير كبير على الناس بس أنا من المدرسة القديمة ومركزة في شغلي، بحب الفن ككتلة على بعض ويوم ما أقرر أن مش همثل هعمل حاجة فنية من ورا الكواليس، أنا بحب صناعة الإبداع جدًا".

وفسرت نيللي كريم قائلة: " أنا من أكتر الناس اللي عملت بطولة جماعية، ومسلسل روز كان تاني عمل يجمعني مع الفنانة يسرا، أنك تشوف يسرا كل يوم ده حاجة جميلة قوي، هي بتحب الحياة والناس كلها والتجربة كانت مختلفة الحقيقة".

وتابعت نيللي قائلة: "الحمد لله الواحد عنده رصيد تقيل في الدراما ومقصرتش فيها، ونفسي التأثير بتاع الدراما يحصل في السينما، بعتبر مسلسل ذات من الأعمال الكلاسكية، وفي ناس كتير لغاية دلوقتي من وقت ما نزل من 10 سنين لسه بيتفرجوا عليه".

وتحدثت نيللي عن مسلسلي سجن النسا وتحت السيطرة قائلة: "سجن النسا من المسلسلات اللي تعرفي تتفرجي عليها دلوقتي، هو مسلسل قاسي يعني لو مودك حلو متتفرجيش عليه، أما مسلسل تحت السيطرة من المسلسلات المهمة اللي أثرت في ناس كتير، وفي واحد عالج ابنه من الإدمان بسببه".