لقاء الخميسي عن والدها: كنت متمهدة لوفاته وبكلمه لحد دلوقتي

كشفت الفنانة لقاء الخميسي عن ذكريات طفولتها ووالدتها، وأشارت إلى أنها عاشت طفولة جميلة ولم تنسى ذكرياتها مع والدها الراحل الذي سيظل الرجل الأخير في حياتها.

قالت لقاء الخميسي خلال لقاءها في برنامج In Deep مع الإعلامي تامر شلتوت: "عشت طفولة جميلة وأول حاجة بفتكرها منها هو بابا، أنا بموت فيه هو الرجل الأول والأخير في حياتي وفي النص بقى بييجي شوية رجالة، أبويا كان صاحبي وصديقي مكنتش بخبي عنه أى حاجة، بشوفه راجل مختلف وحساس وراقي وطيب، لما بيتعصب الدنيا بتبقى وحشة قوي، لكن ده طبيعي لإنه كان شخص هادي".

تصريحات لقاء الخميسي عن والدها

وأضافت لقاء الخميسي: "أنا البنت الكبيرة وبابا مكنش بيزعق لما نغلط لكن كان بيقعد يشرح لينا ويجاوب على الأسئلة بتاعتنا والعلاقة اللي بينا ملهاش وصف، هو كان ومازال صوتي الداخلي، لحد دلوقتي بكلمه وبيرد عليا وبقوله على كل الحاجات الحلوة والوحشة، وساعات بتحصلي علامات وبقول إن ده رده".

وعن وفاة والدها، أضافت: "وفاة والدي كانت متمهدة ليا لإنه توفى بالسرطان والدكاترة قالوا إن دي النهاية ومع ذلك كنت في حالة إنكار ومكنتش ببقى عايزة أدخل أشوفه، لإني ساعتها مش هشوف الراجل اللي أنا عرفاه كنت هشوف واحد تاني مش قادر يعمل أى حاجة كان متعود عليها، ودي كانت حاجة بتجرحني قوي وكنت بكلم ربنا وبتوجع قوي، ولما توفى كل اللي حواليا استغربوا من قوتي لإني مؤمنة إنه هيفضل عايش جوايا".

واختتمت لقاء الخميسي حديثها، قائلة: "كنت بزعل وبقول لربنا ليه تعمل كده فيه؟، بعد ما مشي كانت مأساة بس أنا كنت قوية قوي من بره، ومن جوه ضعيفة، لأني مؤمنة أنه مماتش، هو موجود طول الوقت، لو عندي مشكلة  في حاجة أنا عارفة هو عايزني أعمل إيه، أنا عايشة بنصايحه لحد دلوقتي".