رضوى الشربيني عن طلاق أحمد سعد وعلياء: كانت بتاخد رأيي في المشاكل
أعلنت الإعلامية رضوى الشربيني سبب انفصال الفنان أحمد سعد عن زوجته مصممة الأزياء علياء بسيوني، وأشارت إلى أن علياء صديقتها منذ سبع سنوات وأن علاقتها بأحمد جيدة للغاية، بالإضافة إلى أنها كانت شاهدة على علاقتهما من بدايتها منذ 4 سنوات.
تصريحات رضوى الشربيني
وصرحت رضوى الشربيني خلال برنامجها "هى وبس" المذاع عبر قناة "سي بي سي سفرة" قائلة: "أنا كنت شاهدة على جوازة أحمد وعلياء من الأول، وهما الاتنين عارفين بعض من 4 سنين، مش هقدر أحكي تفاصيل كتير عن المشكلة اللي بينهم، على الأقل في الوقت الحالي، لإن علاقتي بيهم كويسة جدًا وعاصرت معاهم مشاكل كتير في علاقتهم وكانت بتاخد رأيي كصديقة في حاجات كتير، وأنا كنت دايمًا بقولها اديله فرصة تانية وساعات كنت بكلمه بنفسي".
وبالنسبة للأشخاص الذين هاجموا علياء بسيوني بسبب ما كتبته على صفحتها الشخصية عبر انستجرام بعد الانفصال، قالت رضوى: "علياء بتقول إنه مكنش صح إنها تكتب اللي هى كتبته ده على السوشيال ميديا عن أحمد سعد، ولكن هي عملت كده من غضبها كأم على بنتها، عشان هي كانت متوقعة أن أحمد هيرجع من السعودية عشان يشوف بنته اللي رجلها اتكسرت بسبب حادثة في السعودية".
وأكملت الإعلامية رضوى الشربيني دفاعًًا عن علياء بسيوني قائلة: "علياء كانت متوقعة إن أحمد قبل ما يروح الساحل الشمالي هيرجع الأول عشان يشوف بنته اللي عملت حادثة مع والدتها، والدكاترة قالوا إنها لازم تعمل عملية عشان ده ميأثرش عليها في المستقبل، وتفاجأت أنهم وضعوا رجلها في الجبس بس، وغير كل ده فاجئها أحمد سعد بأنه عايز يطلقها".
وأردفت رضوى الشربيني، أن علياء بسيوني تعترف بأنها أخطأت، وكان من الواجب عليها ألا تفعل ذلك على مواقع التواصل الإجتماعي وقالت: "ولكن علياء لها عذر أنها أم وبنتها أصيبت في حادثة وبتصرخ وعندها 40 يوم بس، وبدل ما أبوها ييجي يشوفها ويتطمن عليها نزل من السعودية على الساحل الشمالي"، وأشارت إلى أن علياء تطاولت عليه واخطأت في حقه أثناء التعبير عن غضبها، ولكن هى "طلع عينها"، وأضافت: "وبتمنى يرجعوا لبعض".
طلاق علياء بسيوني وأحمد سعد
يذكر أنه سبق أن أعلنت علياء بسيوني يوم الثلاثاء الماضي انفصالها عن زوجها أحمد سعد، وذلك بناءً على رغبته، وكتبت عبر حسابها الشخصي على موقع التواصل الإجتماعي انستجرام: "شكرًا على معدنك السيئ وأصلك غير الطيب وشكرًا على المقلب اللي أخدته في العلاقة دي، واللي كنت بضحي فيها وبحارب لوحدي، وربنا ينتقم منك ويقف معايا أنا وبناتي".
